Афанасий Петров кэриэһигэр…

Мэҥэ-Хаҥалас Петровкатыгар бэйэтин кэмигэр Саха сирин боксатыгар уос номоҕор киирбит боксер Афанасий Федорович Петров кэриэһигэр күрэхтэһии саҕаланна.

Турнир үөрүүлээх аһыллыытыгар спорт үтүөлээх маастардара Георгий Балакшин, Василий Егоров тыл эттилэр, кыттыылаахтары уонна мустубут дьону эҕэрдэлээтилэр.

Хара орто оскуолатын спортсаалатыгар турбут рингэҕэ 95 спортсмен тахсар буолла, барыта сүүрбэччэ хамаанда баар. Ол иһигэр Үөһээ Бүлүүттэн, Сунтаартан, Дьааҥыттан, Өлөөнтөн боксердар кэлбиттэр. Оннооҕор Чита куораттан судьуйалаах хамаанда кыттар.

Күрэхтэһии оҕолорго эрэ буолбакка, улахан дьоҥҥо эмиэ ыытыллар. Финал күнүгэр ыарахан ыйааһыҥҥа Саха сирин 14 төгүллээх чемпиона Петр Егоров уонна республика 2025 с. чемпиона Яков Седалищев икки ардыларыгар профессиональнай боксаҕа күөн көрсүү буолуоҕа.

Күрэхтэһии тэрээһинэ олус үрдүк таһымнааҕа харахха тута көстөр. Бириистэр даҕаны ботуччулар – убаһа, тиҥэһэ сүөһү, тарбыйах, харчынан бириистэр турбуттар.

Афанасий Петров Саха сирин икки төгүллээх, «Урожай» общество уон төгүллээх чемпиона этэ. Өр сылларга Мэҥэ-Хаҥаласка боксаҕа бэриниилээхтик тренердээн, үгүс боксеру иитэн-такайан таһаарбыта. Олор истэриттэн аан дойду чемпионатын үрүҥ көмүс призера, Европа икки төгүллээх чемпиона Василий Егоров, республика үтүөлээх тренердэрэ Василий Шестаков, Николай Егоров үүнэн-сайдан таҕыстылар.

Гаврил СТРУЧКОВ.

Ааптар түһэриитэ