65 саастаах эстафета – Үөһээ Бүлүүгэ

Муус устар 11 күнүгэр үгэскэ кубулуйбут «Үөһээ Бүлүү» хаһыат бирииһигэр чэпчэки атлетикаҕа 65-с төгүлүн ыытыллар үбүлүөйдээх эстафета буолан ааста.

Эстафета сүрүн сыала-соруга Үөһээ Бүлүү улууһугар чэпчэки атлетиканы сайыннарыы уонна чөл олоххо көҕүлээһин, бииртэн-биир чулуу спорстменнары таһаарыы, үүнэр көлүөнэҕэ дойдуга бэриниилээх буолууну иитии буолар. Бастакы бөлөххө эстафета этаптара:

1 этап — 300 м (уолаттар), 2 этап — 300 м (кыргыттар), 3 этап — 800 м (уолаттар), 4 этап — 400 м (кыргыттар), 5 этап — 300 м (уолаттар), 6 этап — 200 м (кыргыттар), 7 этап — 300 м (уолаттар), финиш — 8 этап — 200 (кыргыттар). Дистанция уопсай уһуна 2 км 800 м.

Иккис уонна үһүс бөлөххө эстафета этаптара:

1 этап — 300 м (икки бөлөххө уолаттар, үһүс бөлөххө 1986 сыллааҕы төрүөх уонна онтон аҕа саастаах эр дьон), 2 этап — 300 м (дьахталлар), 3 этап — 800 м (эр дьон), 4 этап — 400 м (дьахталлар), 5 этап — 300 м (эр дьон), 6 этап — 200 м (дьахталлар), 7 этап — 300 м (эр дьон), 8 этап — 200 м (дьахталлар). Дистанция уопсай уһуна 2 км 800 м.

Үөһээ Бүлүү улууһун 16 оскуолата уонна нэһилиэк хамаандалара илин кэлин түһүстүлэр. 16 оскуола 2 бөлөххө арахсан сүүрдэ. Сүрүн оскуолаларга 3 оскуола сүүрбүтүттэн барыларын ырааҕынан хааллартаан Мэйик оскуола маҥнайгы миэстэҕэ таҕыста, 2-с миэстэ Оҥхой, 3-с миэстэҕэ Хомустаах оскуолалара буоллулар.

Орто оскуолаларга былырыыҥҥы, ол иннинээҕи эстафета кыһыл көмүс кубогын хаһаайына, И.Н. Барахов аатынан 1-кы нүөмэрдээх оскуола хамаандата бастаата, иккиһинэн эрэллээхтик М.А. Алексеев аатынан Өрөспүүбүлүкэтээҕи лиссиэй-интэринээт хамаандата кэллэ, үһүс миэстэни Ю.Н. Прокопьев аатынан 3-с нүөмэрдээх оскуола ылары ситистэ.

Нэһилиэктэр икки ардыларынааҕы эстафетаҕа 1-кы миэстэҕэ Үөдүгэй, иккискэ Үөһээ Бүлүү, үһүскэ Дүллүкү нэһилиэгин быһыйдара буоллулар.

Быйылгы күрэхтэһии сүрүн уратытынан эстафета кэннэ Үөһээ Бүлүү улууһуттан төрүттээх соҕотох Арассыыйа дьоруойа Алексей Рафаэлович Петров — Медведь аатынан 500мм сүүрүү буолар. 1 м — И.Н. Барахов аатынан 1-кы нүөмэрдээх оскуола үөрэнээччитэ Алексей Филиппов 15 тыһ. харчынан, кубогынан, чөмпүйүөн аалай лентатынан наҕараадаланна. Чуолаан эттэххэ, 15 тыһ. сүрүн бирииһи Алексей Рафаэлович бэйэтэ үөрүүнү кытары туруорбут, 2-с миэстэ буолбукка 10 тыһ. Үөһээ Бүлүү улууһун баһылыга Валерий Валериевич Николаев биэрбит, онтон 3-с миэстэ буолбукка «Үөһээ Бүлүү» хаһыат эрэдээксийэтэ 5тыһ. харчыны туруорбут.

Сылын аайы эстафета маҥнайгы этабыгар бастаабыкка харчынан бириис туттарыллар. Бэтэрээннэргэ бастакы миэстэни Кэнтик нэһилиэгиттэн Степан Родионов, орто оскуолаларга И.Н. Барахов аатынан 1-кы нүөмэрдээх оскуола үөрэнээччитэ Алексей Филиппов, сүрүн оскуолаларга Мэйиктэн Давид Чириков буоллулар.

Маны таһынан, 11-с кылааһы бүтэрэр, эстафетаҕа сылын аайы көтүппэккэ кыттар оҕолорго редакция аатыттан Бочуотунай грамоталары туттартаатылар.

Быйыл Мэйик нэһилиэгиттэн чэпчэки атлетикаҕа Норуоттар икки ардыларынааҕы кылаастаах успуорт маастара Николай Харлампьевич Бускаров маҥнайгы этапка сүүрэн паалкатын 4-с аҕалан биэрбит. Бэйэтиттэн төһө эмит эдэрдэри кытары сүүрбүт буоллаҕына үчүгэй көрдөрүү. Билигин да үчүгэй, чөл туруктааҕын, дьарыктааҕын көрдөрөр. Үүнэр көлүөнэ оҕолоругар, чуолаан сүүрүктэргэ холобур буолар.

Маны таһынан Үөһээ Бүлүү биир ааттаах-суоллаах сүүрүгэ, хотугу дэгит күрэһэр уонна чэпчэки атлетикаҕа Арассыыйа успуордун маастара, хотугу дэгит күрэһэр Саха сирин успуордун маастара Пелагея Дьячковская кэлэн сүүрдэ: «Үбүлүөйдээх эстафетаҕа Үөһээ Бүлүүм аатыттан сүүрэ кэллим уонна олох кырабыттан 4 этабы отой уларыппакка куруук 400 миэтэрэбин сүүрэбин«, — диэн кэпсээтэ. Үүнэн-сайдан, саҥа тахсан эрэр сүүрүктэргэ үчүгэйдик дьарыктаныҥ диэн баҕа санаатын эттэ.

Мин быйыл 11-с кылааһы бүтэрэбин, бу эстафетаҕа 4-с сылбын сүүрдүм. 2022 сыллаахха 200 миэтэрэҕэ Өрөспүүбүлүкэтээҕи лиссиэй-интэринээт аатыттан бастакыбын сүүрбүтүм. Дүллүкү оскуолатыгар 2024 сылтан саҕалаан 200 м, 2025 сылга 300 м, онтон быйыл оскуола оҕолоругар 400 м уонна нэһилиэктэргэ 200 м сүүрдүм. Бу сүүрэр сылларбар тренердэрим Сардаана Тусаховна Герасимова уонна Аркадий Григорьевич Лазарев этилэр. Хас да күрэхтэһиигэ, эстафеталарга кыттыбыппыттан саамай ураты уонна сөбүлүүр эстафетам «Үөһээ Бүлүү» хаһыат бирииһин эстафетата. 65-с төгүлүн ыытыллар эстафета биһиги өрөспүүбүлүкэбитигэр соҕотох дии саныыбын.

«ҮӨҺЭЭ БҮЛҮҮ» хаһыат бирииһигэр эстафета сыл ахсын сүүрүүнү сэҥээрээччилэри, спорду таптааччылары, ааттаах-суоллаах спортсменнары биир күрэххэ, сыалга-сорукка түмэр. Төгүрүк сыл устата киһи барыта күүтэр, кэтэһэр, утумнаахтык дьарыктанар. Сылтан сыл күүстээх спортсменнар ааттара ааттана турар. Бу эстафета кыттыылаахтарыттан инникитин ким эмит, биир дойдулаахтарбыт Николай Бускаров, Сардаана Трофимова, Пелагея Дьячковская курдук үрдүк таһымнаах, ааттаах-суоллаах улахан спортсменнар Үөһээ Бүлүүттэн үүнэн-үөскээн, силистэнэн тахсыахтара диэн эрэнэбит. Спорду таптааҥ, чөл олоҕу тутуһуҥ, чэгиэн-чэбдик буолуҥ!

Алина САННИКОВА, 11-с кылаас үөрэнээччитэ, «Эрчим» медиакиин, Дүллүкү орто оскуолата.

Үөһээ Бүлүү.