Үрдүк таһымнаах волейбол турнира

Муус устар 4-5 күннэригэр Нам улууһун l-кы Хомустаах нэһилиэгэр волейболга, Иван уонна уола Александр Федоровтар кэриэстэригэр республика турнира үһүс төгүлүн ыытылынна.

Ол курдук, турнир 2019, 2022 сылларга киэҥ далааһыннаахтык ыытыллыбыттара. Быйылгы турнирга эмиэ күүтүллүбүтүн курдук, 16 хамаанда республикабыт тыа сирин нэһилиэктэрин хабар сыаллаах тэрээһининэн ыытылынна. Турнирга Хаҥалас улууһуттан Булгунньахтаах, Сиинэ уонна Улахан Аан, Амматтан Алтан уонна Сулҕаччы, Тааттаттан Кыйы хамаандатын кытта Нам улууһун 9 нэһилиэктэрин хамаандата кытынна.

Тэрийэр комиссия 16 хамаанданы түөрт нэһилиэккэ арааран ыыппыта олус тоҕоостооҕун көрдөрдө. Ол курдук, бэйэлэрин бөлөхтөрүгэр бастакы-иккис миэстэлэри ылбыттар, Хомустаах нэһилиэгэр финал аҥарын уонна финальнай көрсүһүүлэрин үрдүк таһымҥа ыыппыттара ордук кэрэхсэннэ.

Өрөбүл күн үс бастакы миэстэлэри быһаарсыыга үһүс миэстэҕэ Хамаҕатта нэһилиэгин хамаандата Көбөкөн күүстээх хамаандатын сабырыйан таҕыста. Финалга Амма улууһун Сулҕаччы хамаандатын кытта Айсен Жерготов тренер-оонньооччулаах «Табаарыстар» диэн республикатааҕы Олимпийскай эрэл спортивнай оскуолатын иитиллээччилэрэ таҕыстылар.

Бу оҕолор көрсүбүт хамаандаларын барыларын 2:0 ахсаанынан кыайан, финалга эмиэ оннук көрдөрүүнү ситиһэн, чемпион үрдүк аатын ыллылар. Үс бастакы миэстэлэри ылбыт хамаандаларга: бастакы миэстэҕэ 50 тыһыынча сууммалаах сертификаты – Федоровтар аймахтара, иккис миэстэҕэ 30 тыһыынча – Хомустаах волейболнай кулууба уонна үһүс миэстэҕэ 20 тыһыынча — «1984 сыл выпустара» туттардылар.

Маны таһынан анал бириистэринэн: «Бастыҥ күүстээх охсооччу» — Николай Бочуров (Көбөкөн), «Бастыҥ туруорааччы» — Айсен Христофоров (Сулҕаччы), «Бастыҥ оонньооччу» — Андрей Григорьев («Табаарыстар»), «Бастыҥ көмүскээччи» — Денис Осетров (Хамаҕатта), «Бастыҥ кэскиллээх оонньоочу» — 11 саастаах Айтал Жерготов уо.д.а. 20 -лии уонна 25-тии тыһыынчалаах сертификаттарынан наҕараадаланнылар.

Кэрэхсэбиллээҕэ диэн, биирдиилээн бириистэри тус доҕотторо, табаарыстара, бииргэ үөрэммит уонна бииргэ оонньообут табаарыстара туттарбыттара тоҕоостоох дии саныыбын.

Бу турнир сүрүн судьуйатынан Айсен Жерготов хара маҥнайгыттан үрдүк таһымҥа ыыппыта холобур буолла.

Спорт бэтэрээнэ Анатолий СОФРОНОВ — Онтуон.