Үгэс салҕана турара кэрэхсэбиллээх

В.П. Керемясов аатынан Дьокуускай куорат 3 №-дээх спорка кыһатын тустууга саалатыгар ССРС успуордун маастара, Саха сирин үтүөлээх тириэньэрэ Николай Кириллович Алексеев – Матбор кэриэһигэр аҕам саастаах бөҕөстөргө Саха сирин көҥүл тустууга чөмпүйэнээтэ түмүктэннэ.

Күрэхтэһии – өрөспүүбүлүкэҕэ көҥүл тустуу сайдыбыта 70 сылыгар ананан тэрилиннэ. Бу түһүлгэ биһиги бөҕөстөрбүт Арассыыйа уонна аан дойду чөмпүйэнээттэригэр бэлэмнэниилэрин быһыытынан көрүллэр. Ылан көрдөххө, аҕам саастаахтарбыт сыллата Арассыыйа уонна аан дойду түһүлгэлэригэр ситиһиилээхтик кытталлар. Быйылгы да сылга эриэ-дэхси көрдөрүүнү кэтэһэбит. Онуоха, бу ыытыллан түмүктэммит күрэхтэһии олук буолуохтун диэххэ.

Көбүөргэ барыта 54 аҕам саастаах бөҕөс тахсан күөн көрүстэ. Төһө да өрүһүнэн сылдьыы тохтотуллан эрэрин үрдүнэн Амматтан, Тааттаттан, Чурапчыттан, Уус Алдантан, Мэҥэ Хаҥаластан эдэрдии эрчимнээх бөҕөстөр кэлэн күүстэрин холостулар. Састаап да добуччу күүстээх диэххэ наада. Сурдлимпиада чөмпүйүөнэ, успуорт үтүөлээх маастара Василий Стрекаловскай, ССРС успуордун маастардара Ефрем Ефремов, Егор Красильников, Михаил Тихонов, Андрей Александров, аҕам саастаахтарга аан дойду чөмпүйүөнэ Алексей Николаев, аан дойду чөмпүйэнээтин призера Андрей Иннокентьев, норуоттар икки ардыларынааҕы кылаастаах успуорт маастара Александр Птицын, Арассыыйа күүстээх маастардара Айаал Павлов, Михаил Захаров, Николай Олесов, Вячеслав Кривошапкин уо.д.а. түһүлгэ таһымын үрдэттилэр.

Бу санаатахха, өссө Вадим Данилов, Александр Румин, Платон Саввинов, Прокопий Петров уо.д.а. күүстээх маастардар араас биричиинэнэн кыттыбатахтарын ааҕыстахха, Саха сирэ бу саастаахтарга кыахтааҕа көстөр.

Түһүлгэ саамай саастаах кыттааччытынан – эдэригэр РСФСР чөмпүйэнээтин икки төгүллээх призера буола сылдьыбыт, аҕам саастаахтарга аан дойду чөмпүйүөнэ, билигин 72 саастаах Ефрем Ефремов (Амма) буолла. Кини быһаарыылаах хапсыһыыга бэйэтиттэн балыс саастаах, 11 оҕо аҕата Валериан Неустроевка сабырыйтарда.

Аҕам саастаахтар, үөрэтиллибиттэрин-такайыллыбыттарын курдук, көһүтэн кэтэһэн турбакка кимэн киириилээхтик, элбэх албастаахтык тустубуттарын бэлиэтиир оруннаах. Чөмпүйэнээт биир сытыы киирсиитинэн – успуорт маастардара Вячеслав Кривошапкин уонна Михаил Захаров тустуулара буолла. Манна даҕатан эттэххэ, кинилэр билигин тустуу үөһүгэр сылдьаллар. Вячеслав – Бүтүн Арассыыйатааҕы таһымнаах судьуйа буолан, элбэх күрэхтэһиилэри ыытыһар, оттон Михаил – кылгас кэм иһигэр Кыргызстаҥҥа, Монголияҕа, Беларуська ыытыллыбыт күрэхтэһиилэргэ ситиһиилээхтик кыттыбыта.

Бу бөҕөстөр, көрөөччүлэри бүргэс үрдүгэр олордубут сытыы тыҥааһыннаах киирсиилэрэ 2:2 ахсаанынан Кривошапкин туһатыгар түмүктэннэ. Кыайыылаахтары наҕараадалааһын кэмигэр Вячеслав Кривошапкиҥҥа – «Чөмпүйэнээт бастыҥ бөҕөһө» анал бириис туттарылынна.

Ити курдук, кэнники сылларга хапсаҕайга наар күөн көрсөр саастыы Александр Птицын – Айаал Павлов; хапсаҕай маастара Захар Дьячковскай уонна Россия чөмпүйэнээтигэр иккис буола сылдьыбыт Егор Красильников; Кэптэнигэ (Уус Алдан) тириэньэр А.В. Олесовка иитиллэн тахсыбыт маастардар Николай Олесов – Максим Колесов уо.д.а. тустуулара даҕаны болҕомтону тарта.

Чөмпүйэнээт сытыы хапсыһыыларын кэккэ видеоларын “Дьулурҕан” хаһыат телеграмҥа ханаалыгар – t.me/dzulurgan көрүөххүтүн сөп.

Чөмпүйэнээти үөрүүлээхтик аһыыга Саха Өрөспүүбүлүкэтин физическэй култуураҕа уонна успуорка миниистирин бастакы солбуйааччы Гаврил Мохначевскай, Н.К. Алексеев – Матбор бииргэ төрөөбүт быраата Владимир Алексеев, успуорт бэтэрээнэ Макар Яковлев, күрэсчиттэр Саха сиринээҕи холбоһуктарын салайааччы Мария Алексеева, успуорт кыһатын дириэктэрэ Василий Уйгуров кыттыыны ыллылар.

Бу тэрээһин биир бэлиэ түгэнинэн, аҕам саастаахтарга ситиһиилээхтик кыттыбыт бөҕөстөргө таһымнарын туоһулуур анал бэлиэлэри туттарыы буолла. Ол курдук, Василий Пахомовка, Николай Григорьевка, Сергей Ноговицыҥҥа, Алексей Николаевка, Петр Осиповка – Арассыыйа успуордун бэтэрээннэргэ норуоттар икки ардыларынааҕы кылаастаах маастардарын, оттон Николай Ивановка уонна Алексей Николаевка – Арассыыйа успуордун бэтэрээннэргэ маастардара дастабырыанньаны, түөскэ анньыллар бэлиэлэри үөрүүлээх быһыыга-майгыга туттардылар.

Чөмпүйэнээт түмүгүнэн тугу этиэххэ сөбүй? Бастатан туран, Дьокуускай куорат 3 №-дээх успуорка кыһатын салалтата (дириэктэр В.В. Уйгуров) уонна кэллэктиибэ икки сыллаах тохтобул кэнниттэн бу күрэхтэһиини сөргүтэн уонна тэрээһин боппуруостарын барытын бэйэлэригэр ылынан ыыппыттарын бэлиэтиир тоҕоостоох. Василий Васильевич бэйэтэ түһүлгэ бас судьуйатынан, оттон кини бастакы солбуйааччыта Вячеслав Кривошапкин тустарын быыһыгар сүрүн сэкиритээр быһыытынан үлэлээтилэр. Тренердэр бары кэриэтэ күрэхтэһии тэрээһинигэр уонна судьуйалааһыҥҥа үлэлэстилэр.

Санатан эттэххэ, урукку сылларга бу кыһа дириэктэрэ Федот Архипович Соловьев үүннээһининэн-тэһииннээһининэн аҕам саастаахтар күрэхтэһиилэрэ сыллата ыытыллара. Ситиһиилэр да бааллара. Ол үгэс салҕана турара кэрэхсэбиллээх.

Чөмпүйэнээт түмүк көрдөрүүтэ уонна Түһүлгэ хаартысканан түгэннэрэ – dzulurgan.ru сайтка туспа таһаарылыннылар.

Петр ПАВЛОВ.

Ааптар хаартыскалара.