Үбүлүөйүнэн спартакиада тэрийдилэр

«Кыайыы 50 сыла» Спорт дыбарыаһыгар Саха Республикатын авиацияҕа уонна транспорка тэрилтэлэрин үлэһиттэрин спартакиадата ньиргийэн ааста. Тэрээһин, Саха сиринээҕи авиация техническэй училищета тэриллибитэ 30 сылыгар ананан ыытылынна.

Спартакиаданы В.И. Гришуков аатынан авиционнай училище Дьокуускайдааҕы филиала бэлэмнээн, тэрийэн ыытта.

Күрэхтэһии – остуол тенниһигэр, стритболга уонна волейболга буолла. Икки күн устата барыта 200-чэкэ киһи кытынна. Манан бу эйгэ үлэһиттэрэ чөл, чэгиэн-чэбдик олоххо тардыһыылара күүстээҕэ, иллэҥ кэмнэрин туһалаахтык атаараллара көстөр. Спартакиаданы үөрүүлээхтик аһыы үрдүк таһымнаахтык барда.

Ол туһунан Авиация училищетын дириэктэрин солбуйааччы Анастасия Гавриловна Соколова санаатын маннык үллэһиннэ:

-Биһиги маннык, спорка улахан таһымнаах күрэхтэһиини – спартакиаданы аан бастаан тэрийэн ыытабыт. Хамаандалар кэлэн кыттыбыттара сүрдээх кэрэхсэбиллээх, кинилэргэ барыларыгар махтанабыт. Биһиги училищебыт хамаандата үчүгэйдик кытта сылдьар. Студеннарбыт да, үлэһиттэрбит даҕаны спорка чугастар, араас күрэхтэһиилэргэ кытталлар. Саха сирин волейболга сүүмэрдэммит хамаандатын састаабыгар тиийэ киирэллэр.     

Остуол тенниһигэр күрэхтэһии Дьокуускай куорат 5 №-дээх спортивнай оскуолатыгар, оттон стритбол уонна волейбол күрэхтэһиилэрэ – «Кыайыы 50 сыла» Спорт дыбарыаһыгар ыытылыннылар.

Күрэхтэһии хамаанданан ыытылынна, кыайыылаахтар мэтээллэринэн, дипломнарынан наҕараадаланнылар. Ону тэҥэ бастыҥ спортсменнарга анал бириистэр оонньоннулар. Ол курдук, стритболга «Бастыҥ кимээччинэн» — Алексей Потапов, «Бастыҥ оонньоочунан» — Дмитрий Фалеев, «Бастыҥ көмүскээччинэн» — Саян Васильев, оттон волейболга Николай Жирков – «Бастыҥ кимээччинэн», Вероника Неустроева — «Бастыҥ сибээстээччинэн» уонна Игнатий Шарин – «Бастыҥ оонньооччунан» ааттаннылар.

Оттон Спартакиада сүрүн бирииһэ – кубок, хамаанданан кыайыылаах тахсыбыт Авиация училищетын хамаандатыгар туттарылынна.

Күрэхтэһии кылаабынай судьуйата, Авиация училищетын физическэй култуураҕа преподавателэ Михаил Николаевич Хоютанов:

—Быйыл училищебыт отут сыллаах үбүлүөйдээх сыла. Онон сибээстээн спартакиада тэрийдибит. Манна авиацияҕа сыһыаннаах үлэһиттэр уонна студеннар кытталлар. Волейболга алта хамаанда кытынна: «Авиалесохрана», транспортнай полиция, «Полярные авиалинии», «Якутия» авиакомпания, АСВС диспетчердэрэ уонна авиционнай училище хамаандалара. Биһиги, авиация училищетын хамаандата – остуол тенниһигэр уонна волейболга бастаата, стритболга иккис буолла. Итинэн уопсай кубогы ылар чиэстэннибит.

Училищебыт студеннара куорат ыытар спорка күрэхтэһиилэригэр, студеннар лигаларыгар барытыгар көхтөөхтүк кыттар, Дальнай Востокка тиийэ күрэхтэһэллэр. Кыайыыбыт-хотуубут элбэх диэххэ сөп. Кыттыбыт, миэстэлэспит дьон кубок, мэтээл ылан сүрдээҕин үөрдүлэр, астыннылар. Спартакиада кэмигэр күрэхтэһээччилэри, судьуйалары барыларын аһылыгынан хааччыйдыбыт. Хас биирдии көрүҥнэргэ бастыҥнарга анал бириистэр туттарылыннылар. Уопсайынан. кыттааччылар тэрээһинтэн наһаа үөрдүлэр.

Спартакиада түмүгэ

Остуол тенниһэ: 1. Авиация училищета, 2. «Якутия» авиакомпания, 3. «Авиа лесохрана», 4. АСВС, 5. Транспорт полицията, 6. «Полярные авиалинии».

Стритбол: 1. Транспорт полицията, 2. Авиация училищета, 3. «Авиа лесохрана», 4. «Якутия» авиакомпания.

Волейбол: 1. Авиация училищета, 2. «Авиа лесохрана», 3. «Якутия» авиакомпания, 4. «Полярные авиалинии», 5. Транспорт полицията, 6. АСВС.

Уопсай түмүк: 1. Авиация училищета, 2. «Авиа лесохрана», 3. «Якутия» авиакомпания, 4. Транспорт полицията, 5. «Полярные авиалинии», 6. АСВС.

Петр ПАВЛОВ.

Ааптар хаартыската.