Вячеслав Карпов аатынан бириис кимиэхэ тигистэ?

Тааттаҕа ыытыллан түмүктэммит Н.Н. Тарскай кэриэһигэр көҥүл тустууга Саха сирин чемпионатыгар урукку сылларга төрөөбүт дойдуларын дорҕоонноохтук ааттаппыт биллиилээх бөҕөстөр ааттарынан анал бириистэр туруоруллан, түһүлгэни киэргэттэ, дьон-сэргэ биһирэбилин ылла диэххэ сөп.

Сахалартан көҥүл тустууга уолаттарга Советскай Союз бастакы чемпиона, тустууга ССРС, хапсаҕайга Саха АССР спортарын маастара, дуобакка спорт маастарыгар кандидат, Д.П. Коркин аатынан Саха Республикатын физическэй культураҕа уонна спорка бириэмийэтин лауреата, Чурапчы улууһун бочуоттаах гражданина Вячеслав Павлович Карпов аатынан, кини дьиэ кэргэнэ олохтообут анал бирииһэ 2022 сылтан оонньонор. Бириис, балаһыанньа быһыытынан иккис олимпийскай ыйааһыҥҥа – ол аата, 65 киилэҕэ бастаабыт бөҕөскө туттарыллар.

Быйылгы чемпионакка бу бириис иһин сүүрбэ бөҕөс күөн көрүстэ. Онуоха, утарсааччыларын холкутук кыайталаан быһаарыылаах хапсыһыыга Россия чемпионатын боруонса призера Виктор Яковлев уонна Саха сирин 2019 сыллааҕы чемпиона, олохтоохтор эрэллэрэ Семен Владимиров көрүстүлэр. Бу сүрдээх тыҥааһыннаахтык барбыт тустуу, эдэр бөҕөс Виктор Яковлев 4:1 ахсаанынан кыайыытынан түмүктэннэ.

Онон, Вячеслав Карпов аатынан 2026 сыллааҕы бирииһи Дьокуускай бөҕөһө Виктор Яковлев (тренерэ – СР үтүөлээх тренерэ Н.Н. Рожин) ылары ситистэ. Киниэхэ анал бирииһи кытта 30 тыһ. солк. харчыны – В.П. Карпов төрөппүт уола Павел Карпов туттарда.

Санатан эттэххэ, инники сылларга маннык бириис хаһаайыннарынан буолбуттара: 2022 уонна 2023 сс. – Эдуард Григорьев (Чурапчы), 2024 – Дьулустаан Тотонов (Сунтаар), 2025 – Юлиан Григорьев (Сунтаар).

Петр ПАВЛОВ.

Ааптар хаартыскалара.