Владимир Егоров – Дан Колов турнирын кыайыылааҕа

Эрдэ иһитиннэрбиппит курдук, Болгария Пловдив куоратыгар Дан Колов – Никола Петров ааттарынан спортивнай тустууга норуоттар икки ардыларынааҕы турнир буола турар.

Бастакы күн көҥүл тустууга биэс ыйааһыҥҥа кыайыылаахтар быһаарылыннылар. Бу турнирга саха тустууга кыһатыттан Европа-2022 сыллааҕы чемпиона, Хотугу Македония кыайыылааҕа Владимир Егоров кытынна.

Кини 61 киилэҕэ түөртэ тустан – төрдүөннэригэр кыайыыны ситистэ. Ол курдук, бастаан болгарин Габриел Кондевы 11:0, онтон эмиэ болгарин Эрдал Галибы 10:0, финалга тахсар иһин киирсиигэ украинец Камил Керимовы 2:1 уонна быһаарыылаах хапсыһыыга эмиэ Украина бөҕөһүн Микита Абрамовы 4:0 ахсаанынан кыайталаата.

61 кг: 1. Владимир Егоров — Хотугу Македония, 2. Микита Абрамов — Украина, 3. Камиль Керимов — Украина, Стилиан Илиев — Болгария.

Бу күрэхтэһии киниэхэ, муус устар ортотугар Албания Тирана куоратыгар ыытыллар Европа чемпионатын иннинэ үчүгэй бэлэмнэнии быһыытынан көрүллэр. Аны Владимир иннигэр өссө улахан сыаллар-соруктар тураллар.

Түгэнинэн туһанан Владимиры уонна кини тренерэ Александр Сафроновы эҕэрдэлиибит! Ситиһии сиэттиһэн истин!

Петр ПАВЛОВ.  

PS: Хаартыска Болгария тустууга сайтыттан ылылынна.