Владимир Егоров – Болгария көбүөрүгэр

Кулун тутар 26-28 күннэригэр Болгария Пловдив куоратыгар Дан Колов – Никола Петров ааттарынан үгэскэ кубулуйбут спортивнай тустууга норуоттар икки ардыларынааҕы турнир ыытыллар. Бу турнир – көҥүл тустууга аан дойдуга биир саамай өртөн ыытыллар баай историялаах турнир. Ол курдук, 63-с төгүлүн ыытыллар. 

Быйылгы турнирга саха тустууга кыһатын иитиллээччитэ, соторутааҕыта Хотугу Македония чемпиона буолбут Амма ыччата Владимир Егоров кыттар.

Владимир тустар 61 кг ыйааһыныгар барыта 12 бөҕөс күөн көрсөр. Биһиги уолбут сэрэбиэй быһыытынан иккис бөлөххө баар. Кини бастаан квалификация түһүмэҕэр болгарин Г.Кондевы кытта тустар. Онно кыайдаҕына, Болгария эдэрдэргэ бастыҥ бөҕөһө Эрдал Галибы кытта киирсиэҕэ. Өссө бу бөлөххө украинец Керимов уонна болгарин Делчев бааллар.

Турнир барылын быһыытынан бүгүн көҥүл тустууга 61-70-79-92 кг ыйааһыннаахтар күрэхтэһиини саҕалыыллар уонна кыайыылаахтар быһаарыллаллар.

Бу күрэхтэһии, Владимир Егоровка, муус устар ыйга ыытыллар Европа чемпионатын иннинэ бэлэмнэнии курдук көрүллэр.

Уолбутугар ситиһиилэри баҕарабыт! Биһиги dzulurgan.ru сайтпытыгар тустуу сонуннарын кэтээн көрө, ааҕа, билэ сылдьыҥ.

Петр ПАВЛОВ.