Тустуу бүттэ. Тустуу салҕанар!

Роман Дмитриев аатынан норуоттар икки ардыларынааҕы турнир дуораана ситэ сүтэ илигинэ, аны бу өрөбүлгэ – кулун тутар 15 күнүгэр «Өрөгөй» күрэс уораҕайыгар Олимпиада-1976 үрүҥ көмүс призера, спорт үтүөлээх маастара Александр Николаевич Иванов 75 сааһын туолбут үбүлүөйүн чэрчитинэн көҥүл тустууга хамаандалар табаарыстыы көрсүһүүлэрэ тэриллиэҕэ.

Иһиттэххэ, бу матчевай көрсүһүүлэргэ Саха сирэ, Бурятия, Монголия уонна Р.М. Дмитриев турнирыгар кыттыбыт дойдулартан, регионнартан сүүмэрдэммит хамаандалар күөн көрсүөхтэрэ.

Маныаха тустууну таптааччылар, биллэн турар, кимнээх кыттыахтарай диэн сэҥээрэллэрэ өйдөнөр. Билиҥҥитэ хамаанда састааба чопчу бу диэн биллибэт. Сэрэйдэххэ, олох бүтэһик күн быһаараллара буолуо.

Оттон биһиги, Саха сирин хамаандатын, буолан ааспыт күрэхтэһиигэ ситиһиилээхтик кыттыбыт бөҕөстөртөн талаллара буолуо дии саныыбыт. Чэ, холобур, маннык буолуон сөп: 57 кг – Анатолий Иванов, 61 кг – Юрий Винокуров, 65 кг – Артур Попов, 70 кг – Сергей Некрасов, 74 кг – Алексей Захаров, 79 кг – Нозим Сафаров, 86 кг – Артур Слепцов, 92 кг – Степан Иванов, 97 кг – Адам Николаев, 125 кг – Михаил Николаев.

Эһиги туох дии саныыгытый? Икки хамаанда киирсэрэ дуу, түөрт дуу? Тэрийээччилэр өртүлэриттэн билиҥҥитэ туох да иһитиннэрии суох.

Петр ПАВЛОВ.