Тарскай тустуута Тааттаҕа

Кулун тутар 28-29 күннэригэр Таатта улууһун ккинигэр Ытык Күөлгэ, А.Е. Турнин аатынан Спорт дыбарыаһыгар Николай Николаевич Тарскай кэриэһигэр көҥүл тустууга Саха сирин биирдиилээн уонна хамаанданан бастыыр иһин чемпионата ыытыллар.

Чемпионат, республикаҕа тустуу сайдыбыта 70 уонна саха бөҕөстөрө Монреаллааҕы-76 Олимпиадаҕа өрөгөйдөрүн 50 сылларыгар ананан ыытыллар.

Былырыын Тааттаҕа, күрэс төрүт көрүҥнэригэр Манчаары оонньууларыгар анаан хас даҕаны тутуулар тутуллан үлэҕэ киллэриллибиттэрэ. Чуолаан, аҥардас бу сылга киирэн баран, А.Е. Турнин аатынан Спорт дыбарыаһыгар эр дьоҥҥо волейболга республика чемпионата уонна төрүт оҕунан ытыыга күрэхтэһии үрдүк тэрээһиннээхтик, күүрүүлээхтик буолан аастылар. Аны бу өрөбүллэргэ манна – тустууга республика чемпионата буолар.

Чемпионат икки көбүөрүнэн ыытыллар. Хапсыһыылар сарсыарда 10:00 чаастан саҕаланыахтара. Чемпионакка 21 хамаандаттан барыта 171 бөҕөс кыттар. Түһүлгэ сүрүн судьуйатынан — Бүтүн Россиятааҕы категориялаах судьуйа Василий Уйгуров, кини көмөлөһөөччүтүнэн — норуоттар икки ардыларынааҕы категориялаах судьуйа Николай Николаев үлэлииллэр.

Тустууну «Саха» национальнай көрдөрөр-иһитиннэрэр хампаанньа «күөх экранынан» быһа көрдөрүүнү тэрийэн ыытыаҕа.

Петр ПАВЛОВ.

Ааптар хаартыската.