Тарскай-2026: Финалга кимнээх таҕыстылар?

Таатта улууһун киинигэр Ытык Күөлгэ, А.Е. Турнин аатынан Спорт дыбарыаһыгар Николай Николаевич Тарскай кэриэһигэр көҥүл тустууга Саха сирин биирдиилээн уонна хамаанданан бастыыр иһин чемпионатын бастакы күнэ түмүктэннэ. Чемпион аатын иһин кимнээх тусталлара билиннэ.

Республика быйылгы 69-с чемпионатыгар 21 хамаандаттан барыта 171 бөҕөс күөн көрүстэ. Ордук элбэх кыттааччыны тустуу биһигэ буолбут Чурапчы хамаандата туруорда, кинилэр 30 бөҕөстөөхтөр. Сунтаар 20 кыттааччылаах. Дьокуускай уонна Таатта 17-дии бөҕөстөөхтөр. Уус Алдан 16 кыттааччылаах. Чуолаан бу хамаандалар сүрүн бириис иһин киирсэллэрэ буолуо диэн сабаҕалааһын баар.

Санатан эттэххэ, бастаабыт хамаанда – 300, иккис буолбут – 200 уонна үһүстээбит – 100 тыһ. солк. харчынан наҕараадаланыахтара.

Бөҕөстөр, Спорт дыбарыаһыгар тэлгэммит икки көбүөргэ ким күүстээҕин быһаарыстылар. Бүгүн бары ыйааһыннарга кимнээх бастакы миэстэ иһин тусталлара быһаарылынна.

Быһаарыылаах хапсыһыыларга киирсиэхтэрэ:

57 кг Любомир Ашеин (Чурапчы) – Федор Постников (Таатта)

61 кг Алексей Копылов (Мэҥэ Хаҥалас) – Яков Павлов (Томпо)

65 кг Виктор Яковлев (Дьокуускай) – Семен Владимиров (Таатта)

70 кг Андрей Мидловец (Амма) – Айхан Антонов (Ньурба)

74 кг Айсен Потапов (Үөһээ Дьааҥы) – Игорь Матвеев (Нам)

79 кг Олег Фомин (Чурапчы) – Албан Аввакумов (Таатта)

86 кг Андриан Ленскэй (Чурапчы) – Артур Слепцов (Мэҥэ Хаҥалас)

92 кг Александр Халыев (Таатта) – Стив Попов (Чурапчы)

97 кг Никита Софронов (Чурапчы) – Евгений Аронов (Мирнэй)

125 кг Никита Хабаров (Мэҥэ Хаҥалас) – Виталий Ефремов (Чурапчы).

Көстөрүн курдук, былырыыҥҥы хамаанданан кыайыылаахтар – чурапчылар алта киһилэрэ чемпион иһин тустуоҕа. Дьиэлээхтэр – таатталар хаһааҥҥытааҕар даҕаны ситиһиилээхтик кытта сылдьаллар. Кинилэр түөрт киһилэрэ финалга таҕыста. Ити курдук, Мэҥэ Хаҥалас хамаандатын үс киһитэ кыһыл көмүс мэтээл иһин тустар. Ол оннугар, кэлиҥҥи сылларга хамаанданан түмүккэ эриэ-дэхси көрдөрүүлээх Сунтаар хамаандата бу сырыыга биир даҕаны финалиһа суох.

Дьэ, ханнык хамаанда бастыырын сарсыҥҥы тустуу быһаарыаҕа.

Сарсын күрэхтэһии сарсыарда 10:00 чааска саҕаланар. Барыл быһыытынан бастаан санааны уоскутар бөлөх тустуулара, оттон бүтэһик быһаарыылаах хапсыһыылар буолуохтара.

Тустууну «Саха» национальнай көрдөрөр-иһитиннэрэр хампаанньа «күөх экранынан» быһа көрдөрөр.

Петр ПАВЛОВ.

Ааптар хаартыскалара.