Табаарыстыы көрсүһүүгэ кимнээх кыттыахтарай?

Кулун тутар 15 күнүгэр «Өрөгөй» Спорка бэлэмнэнии киинигэр Саха сирэ, Бурятия, Монголия уонна Азия хамаандаларын икки ардыларыгар көҥүл тустууга табаарыстыы көрсүһүү тэриллэр. Бу тэрээһин Монреаллааҕы-1976 Олимпиада үрүҥ көмүс призера, спорт үтүөлээх маастара Александр Николаевич Иванов 75 сааһын туолбут үбүлүөйүгэр ананан ыытыллар.

Табаарыстыы көрсүһүү күнүс 13:00 чаастан саҕаланар. Манна, сүрүннээн, ааспыт нэдиэлэҕэ ыытыллан түмүктэммит, олимпийскай чемпион Роман Дмитриев кэриэһигэр норуоттар икки ардыларынааҕы күрэхтэһиигэ кыттыбыт эдэр бөҕөстөр тустуохтара.

Хамаандалар састааптара:

Бурятия: 57 кг – Батор Шобосоев, 61 кг – Алдар Найданов, 65 кг – Очир Цыденов, 70 кг – Зоригто Бароев, 74 кг – Руслан Бадмаев, 79 кг – Бэлигто Лхамажапов, 86 кг – Бато Кырмыгенов, 97 кг – Ока Леджидов.

Шобосоев – Р.М. Дмитриев турнирыгар биир эргиир тустубута. Кини финал 16/1-гэр Роман Кирилиҥҥэ 0:10 ахсаанынан хотторбута. Онон табаарыстыы көрсүһүүгэ кинилэр иккистээн көрсүөхтэрин сөп. Найданов эмиэ биир эргиирдээбитэ, В.Никоновка хотторбута.

Р.М. Дмитриев турнирыгар 61 киилэҕэ иккис миэстэлэммит Очир Цыденов табаарыстыы көрсүһүүгэ 65 кг тустар. Оттон 65 киилэҕэ Г.Попову, В.Соловьеву хоппут Зоригто Бароев эмиэ биир ыйааһын үөһэ тахсан тустуоҕа. Ити курдук, 70 киилэҕэ боруонса мэтээл иһин киирсиигэ Сергей Некрасовка очукуонан ыраастык хотторбут Руслан Бадмаев – 74 кг ыйааһыҥҥа кыттыаҕа.

Салгыы, турнирга Шевелевы, Софронеевы кыайталаабыт Беликгто Лхамажапов бэйэтин – 79 кг ыйааһыныгар тустуоҕа. Бато Кырмыгенов (86 кг) – Р.М. Дмитриев турнирыгар бастаабыта. Кини биһиги Н.Евсееппитин, А.Слепцовпутун кыайталаабыта. Калмыкияттан кэлэн Улан-Удэҕэ үөрэнэр, дьарыктанар Ока Леджинов турнирга Адам Николаев кэнниттэн иккис буолбута. Онон эмиэ иккистээн көрсүөхтэрин сөп.

Көрөргүт курдук, буряттар табаарыстыы көрсүһүүгэ састааптарын аттаран таһаарыыга үс уолларын биирдии ыйааһыны өрө таһааран туһуннараллар. Тоҕо эрэ, 74 кг бастаабыт Дондоковы, үһүс буолбут Шарастепановы састаапка киллэрбэтэхтэр.

Монголия: 57 кг — Очирхуу, 61 кг — Ушуубаяр, 65 кг — Сумьябазар, 70 кг — Анх-Эрдэнэ Алтангерел, 74 кг — Шинекхуу, 79 кг — Золбаяр, 86 кг — Мункхтулга, 92 кг — Баярзавхлан, 97 кг — Баярбаатар.

Буолан ааспыт Р.М. Дмитриев турнирыгар Монголия үс киһинэн кыттыбыта: 61 кг Мягмарсурен финал чиэппэригэр Күндүл Местниковка хотторбута, 65 кг Алтангерел иккис буолбута (кини А.Даниловы, В.Корякины, Э.Гоголевы кыайталаабыта, финалга А.Поповка сабырыттарбыта), 92 кг Баярбаатар бастаабыта (биһигиттэн Д.Константиновы, М.Саморцевы, С.Иванову кыайталаабыта). Кинилэр үһүөн табаарыстыы көрсүһүүлэргэ биирдии ыйааһын өрө тахсан тусталлар. Оттон атыттар табаарыстыы көрсүһүүгэ анаан кэллилэр.

Азия: 57 кг – Александр Жданов, 61 кг – Максим Григорьев, 65 кг – Есболи Тиливади (Кытай), 70 кг – Улар Ерболати (Кытай), 74 кг – Алексей Захаров, 79 кг – Александр Ноговицын, 86 кг – Артур Слепцов, 92 кг – Хайрхан (Кытай).

Азия хамаандата Саха сирин уонна Кытай бөҕөстөрүттэн талылынна. Жданов, Григорьев уонна Захаров – ааспыт өрөбүлгэ буолбут Р.М. Дмитриев аатынан турнирга миэстэлэспиттэрэ.

Кытайдар тустарынан эттэххэ, Тиливади 61 кг биир эргиир тустубута, 70 кг Ерболати – С.Некрасовка хотторбута, 92 кг уһун уҥуохтаах Хайрхан үһүс миэстэлэммитэ.  Бу састаапка, Иркутскайтан Валерий Алагуев (65 кг) уонна Аркадий Черкашин (86 кг) хаалбыттара эбитэ буоллар, өссө үчүгэй буолуохтаах этэ.

Саха сирэ: 57 кг — Роман Кириллин, 61 кг — Юрий Винокуров, 65 кг — Артур Макаров, 70 кг — Сергей Некрасов, 74 кг — Давид Чириков, 79 кг — Назим Сафаров, 86 кг — Пантелеймон Софронеев, 92 кг — Степан Иванов, 97 кг — Адам Николаев.

Састаапка сүрүннээн, Р.М. Дмитриев турнирыгар ситиһиилээхтик кыттыбыт уолаттар киирдилэр. Ол курдук, Юрий Винокуров, Адам Николаев бастаабыттара, Степан Иванов иккис, Артур Макаров, Сергей Некрасов, Нозим Сафаров, Пантелеймон Софронеев – үһүс буолбуттара. Макаров 61 киилэҕэ финал чиэппэригэр бурят Цыденовка 1:3 хотторбута. Онон бу сырыыга ити хотторуутун боруостуохтаах.

Тустууга хамаандалар ыйааһыннарынан табаарыстыы  көрсүһүүлэрэ – ураты көстүүлээх күрэхтэһии. Хас биирдии киирсии хамаанда туһугар тыҥааһыннаах уонна эппиэттээх буолааччы. Көрсүһүү тоҕус ыйааһыҥҥа ыытыллар, 125 киилэҕэ ыалдьыттарбыт кыттааччылара суох буоланнар, ити ыйааһын киллэриллибэтэх. Онон тэҥнэһии диэн суох буолуоҕа.

Петр ПАВЛОВ.