Тааттаҕа гроссмейстер сеанса

Бүгүн киэһэ Таатта улууһун киинигэр Ытык Күөлгэ, улуустааҕы лицейгэ саахыматчыттар түмүстүлэр. Манна соҕурууттан кэлбит гроссмейстер Сергей Викторович Волков саахымакка сеанс ыыта сылдьар.

Ол туһунан биһиэхэ Аллараа Бэстээххэ оҕолору саахымакка үөрэтэр Степан Степанович Соров маннык билиһиннэрэр:

-Бэйэм Тааттаттан төрүттээхпин, ол иһин дойдубар международнай гроссмейстер Сергей Волковы ыҥыран илдьэ кэллим. Кини бүгүн көтөн кэлбитэ. Таатта лицейыгар сеанс биэрэ сылдьар. Сарсын Чөркөөххө республикатааҕы турнирга кыттыахтаах. Оттон өйүүн биир дойдулаахпыт, 11-с кылаас үөрэнээччитэ Альберт Постниковы кытта матч оонньуохтаах. Альберт бэйэтэ республика чемпиона, улахан дьоҥҥо. Тыҥааһыннаах киирсии буолуо диэн кэтэһэбит. Уолбутугар ыалдьабыт, хайдах буолар дьэ? Дьон барыта кэтэһэр, ким кыайарын.

-Бу ыытылла турар сеанс туһунан тугу этиэххин сөбүй?

-Сеанска отут дуоскаҕа Таатта улууһун саамай күүстээх оонньооччулара оҕолордуун-улахаттардыын кэлэн кытта сылдьаллар. Таатта – саахыматы Саха сиригэр төрүттээбит улуус буолар. Онон ааппытын-суолбутун түһэн биэрбэккэ, гроссмейстерга утарсыыны оҥордорбут диэн баҕа санаалаахпыт.

—Гроссмейстер Волков туһунан билиһиннэр эрэ.

-Сергей Саха сиригэр иккис сырыытын кэлиитэ. Россия Кубогын түһүмэҕин быһыытынан ыытыллар Ил Дархан кубогар былырыын кэлэн кыттыбыта уонна сөбүлээбит. Саха сирин дойдутун, сирин-уотун, олохтоохторун. Онон быйыл иккистээн кэллим диир. Бэйэтэ Саранскайтан (Мордовия) сылдьар. Кини международнай гроссмейстер уонна Россия гроссмейстера. Кинини Саха Республикатын саахымакка федерациятын салалтатыттан, Владимир Анатольевич Егоровтан көҥүллэтэн, бу Тааттаҕа илдьэ кэллибит. Манна уолбутун кытта матч оонньотобут диэн. Тааттаҕа улахан таһымнаах гроссмейстер хаһан да кэлэ илигэ. Онон улуус саахыматын өссө үрдүк кэрдиискэ таһаарыа диэн көрдөһөн аҕаллыбыт.

Биһиги кэпсэтиибитигэр биллиилээх спортивнай комментатор Александр Васильев – Көрдүгэн кыттыһар: «Аны манна эбэн эттэххэ, Михаил Афанасьев, Мэндэ Таппыров бу таатталар. Улуу Ойуунускайын, Өксөкүлээх Өлөксөй, Амма Аччыгыйа бары сөбүлээн саахыматтыыр этилэр. Өссө бу С.С. Соров көҕүлээһининэн «Кулунчук» диэн саахымакка үгэс быһыытынан күрэхтэһии ыытыллар. «Азия оҕолоро» норуоттар икки ардыларынааҕы спортивнай оонньуу саахымакка чемпиона Алена Бурмистрова сахалартан соҕотоҕун бастаабыта».

Түөрт чаастаах сеанс түмүгүнэн гроссмейстеры кытта отут киһи оонньообутуттан, соҕотоҕун тренер Айаал Посельскай тэҥнэстэ.

Онон бу күннэргэ Таатта – спорт уйата, киинэ буолла диэтэхпитинэ сыыстарбаппыт буолуо. Тустуу, сеанс, саахымат…

Петр ПАВЛОВ.

Ааптар хаартыската.