Тааттаҕа аан бастаан…

Былырыын саха төрүт күрэс көрүҥнэригэр Манчаары оонньуулара Ытык Таатта улууһугар ыытыллыбыта. Бу улахан тэрээһини көрсө Ытык Күөлгэ чугаһынан суох улахан күрэс уораҕайа тутуллан үлэҕэ киллэриллибитэ. Саҥа тутууга, Таатта улууһун спордугар улахан өҥөлөөх А.Е. Турнин аата иҥэриллибитэ.

Манчаары оонньууларын сүрүн көрүҥнэригэр күрэхтэһиилэр бу күрэс уораҕайыгар тэриллибиттэрэ. Оттон быйыл волейболга эр дьон үрдүкү лигаҕа чемпионата тиҥинээн-таҕынаан ааста. Аны манна көҥүл тустууга Саха сирин чемпионатын көбүөрэ тэлгэнэр буолла.

Таатта – Саха сирин тустуутугар элбэх күүстээх бөҕөстөрү бэлэхтээбит улуус. Сахалартан уолаттарга аан дойду бастакы чемпиона Илларион Федосеев, маастар Калистрат Владимиров, ССРС уолаттарга чемпиона Дмитрий Ючюгяев, Сэбиэскэй Сойуус тыа сирин бөҕөстөрүн хас да төгүллээх чемпиона, Манчаары спартакиадатын хапсаҕайга муҥутуур кыайыылааҕа Владимир Андросов, ССРС Сэбилэниилээх Күүстэрин 3 төгүллээх чемпиона Гаврил Каприн, спорт маастардара Александр Аргунов, Константин Луковцев, Семен Ючюгяев, Роман Шамаев, бэтэрээннэргэ аан дойду икки төгүллээх чемпиона, Саха сирин үтүөлээх тренерэ Иннокентий Кочкин, РСФСР чемпионатын иккис призера Владимир Винокуров, норуоттар икки ардыларынааҕы категориялаах судьуйа Николай Старостин, Россия уонна Саха сирин спортарын маастардара Григорий Массаев, Игнат Андросов, уо.д.а. төрөөбүт Таатталарын ааһан, Саха сирин, Сэбиэскэй Сойууһу, Россияны улахан таһымнаах күрэхтэһиилэргэ ситиһиилээхтик көмүскээбиттэрэ.

Син эмиэ атын оройуоннарга курдук, көҥүл тустуу спорт көрүҥүн быһыытынан бүтүн Саха сирин үрдүнэн тэнийэн тэриллиитин бастакы сылларыгар, Тааттаҕа тренердэр Дмитрий Григорьевич Бравин, Святослав Тихонович Макаров – тустуу секцияларын үлэлэтэн, эдэр талааннары таһаарбыттара. Оройуоҥҥа тустуу сайдыытыгар оччотооҕу салайааччы Алексей Егорович Турнин улахан күүс-көмө, өйөбүл буолбута умнуллубат. Дьэ ол түмүгэр таатталар республикатааҕы күрэхтэһиигэ оччоттон-баччаҕа диэри эриэ-дэхси көрдөрүүнү ситиһэн, бэйэлэрин дойдуларын ааттаттылар да, ааттаталлар даҕаны.

Тааттаҕа көҥүл тустууга республикатааҕы күрэхтэһии хаста даҕаны ыытыллыбыта. Ол курдук, Н.Н. Тарскай кэриэһигэр зонатааҕы күрэхтэһиилэр, олимпийскай чемпион Павел Пинигин бирииһигэр республикатааҕы турнир тэриллибиттэрэ. Аны аан бастаан, дьон-сэргэ биһирэбилин ылбыт көҥүл тустуу бүтүн Саха сирин 2026 сыллааҕы чемпионатын бэлэмнээн, тэрийэн ыытыы итэҕэлэ Тааттаҕа сүктэрилиннэ. Маныаха улуус дьаһалтатын баһылыга Айаал Семенович Бурцев салайааччылаах анал тэрийэр хамыыһыйа тэриллэн, чемпионаты тэрээһиннээхтик ыытарга түбүгүрэ сылдьар. Билигин, төһө да чэпчэкитэ суох күннэр-ыйдар бүрүүкээн турдаллар, Таатталар син эмиэ Манчаары оонньууларын үрдүк таһымнаахтык тэрийэн ыыппыттарын курдук, бу чемпионаты этэҥҥэ бэлэмнээн ыытыахтара диэн бүк эрэнэбит.

Кулун тутар 27-29 күннэригэр Таатта улууһун киинигэр Ытык Күөлгэ, А.Е. Турнин аатынан күрэс уораҕайыгар Николай Николаевич Тарскай кэриэһигэр көҥүл тустууга Саха Республикатын хамаанданан уонна биирдиилээн бастыыр иһин чемпионата ыытыллар. Быйылгы чемпионат, биһиги республикабытыгар көҥүл тустуу тэриллибитэ 70 уонна саха бөҕөстөрө XXI Олимпийскай оонньууларга өрөгөйдөрүн 50 сыллаах үбүлүөйдэрин чэрчитинэн тэриллэр.

Петр ПАВЛОВ.