Сыал-сорук – үс кыһыл көмүс мэтээл

“Мамонт” каналга “ТВ Спорт” биэриигэ Р.М. Дмитриев аатынан Олимпийскай эрэл училищетын дириэктэрэ Семен Сергеевич Чердонов ыалдьыттаан, кулун тутар 7-8 күннэригэр буолаары турар Роман Дмитриев кэриэһигэр көҥүл тустууга норуоттар икки ардыларынааҕы күрэхтэһии туһунан кэпсээтэ.

Кини иһитиннэрбитинэн, быйылгы түһүлгэҕэ тас дойдуларыттан Монголия, Молдова, Казахстан, Кытай бөҕөстөрө, ону тэҥэ Россия регионнарыттан кыттыыны ылыахтара. Монголия уонна Бурятия хамаандалара хаһан баҕарар буоларыныы, толору састаабы туруораллар эбит. Көбүөргэ, быһа холуйан 150-160 кыттааччы күөн көрсүөҕэ. Саха сириттэн тренер Василий Неустроев салалтатынан сүүсчэкэ эдэр бөҕөс тустуоҕа диэн буолла.

Маннык, Роман Дмитриев аатынан 21-гэр диэри саастаахтарга тустууга түһүлгэ Россияҕа соҕотох. Бу саастаахтарга норуоттар икки ардыларынааҕы турнирдар Болгарияҕа, Турцияҕа, Арменияҕа баалларын туһунан Семен Сергеевич санатта.

Кыайыылаахтарга Роман Дмитриев илиитин уунан турар статуэткалара туттарыллыахтара. Ону тэҥэ үгэс быһыытынан, бастыҥ бөҕөстөргө анал бириистэр оонньонуохтара.

Биэриини ыытааччы, суруналыыс Александр Посельскай, хамаанда иннигэр хас мэтээли ылар сыал-сорук турарын туһунан ыйытыытыгар С.С. Чердонов: “Сылыктааһын быһыытынан, саха хамаандата үс кыһыл көмүс мэтээли ыларыгар сыал-сорук турар”, — диэн хоруйдаата.

Салгыы, түһүлгэ сүрүн судьуйатынан – опыттаах судьуйа Омарасхаб Курамагомедов буоларын; күрэхтэһии кэнниттэн анал эрчийэр-үөрэтэр түмсүү тэриллэрин; онно, Роман Дмитриев кэриэһигэр күрэхтэһиигэ тустубуттар салгыы хаалан кытталларын; итиэннэ кулун тутар 15 күнүгэр Олимпиада-76 үрүҥ көмүс призера, спорт үтүөлээх маастара Александр Николаевич Иванов 75 сааһын туолбут үбүлүөйүгэр аналлаах табаарыстыы көрсүһүүгэ кытталларын эттэ.

Дьэ, онон тустууну кэтэһэбит!

Петр ПАВЛОВ.