Олус тэрээһиннээхтик ааста

Былыр-былыргыттан саха омук сырдык санаатын, кутун туттарбыт, сүгүрүйбүт оонньуута  дуобат буолар. Аҕыс ыйдаах амырыын тымныылаах Сахабыт сиригэр буор сыбахтаах балаҕаҥҥа хаайтаран олорон, киэһэтин көмүлүөк оһох сырдыгар, сылааһыгар бигэнэн дуобат оонньууллара эбитэ үһү.

Өрөспүүбүлүкэҕэ дуобат оонньуута сайдыытыгар улахан кылааттаах, өҥөлөөх киһинэн биһиги биир дойдулаахпыт, сахалартан бастакы Аан дойдутааҕы категориялаах судьуйа Дмитрий Сыромятников — Кэрэһиннээх буолар. Түгэнинэн туһанан, биир дойдулаахтарбытын ахтан-санаан аастахха, Иннокентий Васильев, Николай Находкин, бастакы маастарбыт Климентий Попов, үлэ үгэнигэр сылдьар тириэньэр Василий Куприянов о.д.а. буолаллар. Чэ, ити кылгас киирии тыл.

Педагогическай үлэ бэтэрээнэ, РФ норуотун үөрэҕириитин туйгуна, Саха Өрөспүүбүлүкэтин физкултуураҕа уонна успуорка үтүөлээх үлэһитэ, үрдүк таһымнаах ааттаах-суоллаах  судьуйа, биллиилээх коллекционер, ФМЖД маастара Д.В. Сыромятников бирииһигэр өрөспүүбүлүкэ таһымнаах, турнир ХХХ төгүлүн киин куоракка, Дуобат-саахымат киинигэр кулун тутар 21-22 күннэригэр буолан ааста.

Бэтэрээннэргэ сүүс харахтаах дуобакка 61 оонньооччу Намтан, Чурапчыттан, Тааттаттан,  Орто Халыматтан, Дьокуускайтан,  Бүлүүттэн, Сунтаартан, барыта 10-тан тахса  улуустан кэлэн көхтөөхтүк кытыннылар.

Дьэ түмүк хайдах буолла? Икки күннээх сыралаах, сылбалаах, илистиилээх оонньуу түмүгэр эр дьоҥҥо 11 туур түмүгүнэн бастакы миэстэни маастар Валерий Хорин (Дьокуускай) ылла. Кини 10-с төгүлүн бастаата. Иккиһи Бүлүүттэн Андрей Иванов, Дьокуускайтан Евгений Шарин үсүһү ылллылар.

Чурапчыттан Анастасия Собакина дьахталларга хаһыс да сылын субуруччу эрэллээхтик  бастаата. Мария Бырдыннырова (Дьокуускай), Антонина Федорова (Майа) инникилээтилэр.

70-тан аҕа саастаах бэтэрээннэргэ Дмитрий Сыромятников бэйэтэ кыайда-хотто. Салгыы бириистээх миэстэлэри Дьокуускайтан Иван Лазарев, Николай Саввинов ылары ситистилэр.

«Кэрэ-Дуо» (Кэрэһиннээх дуобатыгар) Иннокентий Ефимов лаппа баһыйа тутан кыайда. Салгыы миэстэлэри Семен Местников, Евгений Шарин ыллылар. Дьахталларга Сунтаартан Марианна Григорьева кыайыы өрөгөйүн биллэ. Павлина Дорофеева (Дьокуускай), Анастасия Собакина бириистээх миэстэлэргэ таҕыстылар.

Кыайыылаахтарга анал мэтээллэр, харчынан, ону тэҥэ сыаналаах бириистэр туттарылыннылар. Ону сэргэ төрдүс, бэһис миэстэлээхтэргэ эмиэ ботуччу бириистэр ананнылар.

Күрэхтэһиини үөрүүлээхтик сабыыга бары кыттааччыларга 10000 солк. суумалаах супер бириис оонньоннон, Евгений Шариҥҥа тигистэ. Турниры үрдүк таһымҥа тэрийбит Дмитрий Сыромятниковка оонньооччулар, ыалдьыттар махтаннылар, сыл ахсын быстыбакка ыытылларыгар баҕа санааларын тиэртилэр. Киниэхэ анаан алгыс, хоһоон айа оҕустулар, чэгиэн доруобуйаны баҕардылар, үөрэн-көтөн, астынан-дуоһуйан тарҕастылар.

Степан АНДРЕЕВ. Майа с.

Петр ПАВЛОВ хаартыската.