Мэтээллэри былдьаһыыга кимнээх кыайдылар?

Баскетболга Саха сирин дьахталларга уонна эр дьоҥҥо чемпионаттара түөрт күн устата ньиргийэн аастылар. Бүгүн мэтээллэри былдьаһыы киин куораппыт килбэйэр киинигэр «Кыайыы 50 сыла» Дыбарыаска түмүктэннэ.

Дьахталларга финалга Дьокуускай хамаандата 50:36 ахсаанынан Уус Алдан улууһун кыргыттарын сабырыйан, үрдүкү үктэлгэ таҕыста. Үһүс миэстэни Мирнэй оройуонун хамаандата ылла. Сунтаар – төрдүс, Нам – бэһис, Таатта алтыс буоланнар, эһиил күөх Ньурбаҕа ыытыллыахтаах IX Спортивнай оонньууларга кыттар путевкалары ыллылар.

Эр дьоҥҥо эмиэ киин куораппыт хамаандата инники күөҥҥэ таҕыста. Быһаарыылаах көрсүһүүгэ Хаҥалас улууһун 74:48 ахсаанынан баһыйа тутта, кыайыы кубогын күөрэччи көтөхтө. Боруонса мэтээл Нерюнгрига тигистэ. Нам улууһа төрдүс, Таатта – бэһис, Ленскэй – алтыс. Балар Ньурба путевкаларын хааччыннылар.

Ордук сатабыллаах оонньооччулар анал бириистэргэ тигистилэр. Чулууттан чулуу оонньооччуларынан Евгения Крамаренко итиэннэ Кондрат Хандаев (иккиэн Дьокуускайтан) ааттаннылар.

Саҥардыы үүммүт ый 19-22 күннэригэр эбии алталыы путевканы былдьаһарга аналлаах сүүмэрдиир күрэхтэһии тэриллиэҕэ.

Гаврил СТРУЧКОВ.

Ааптар түһэриитэ.