Леонид Спиридонов: «Тириэньэрим Олег Лебедев үрдүк сыаллары туруорара”

II Дьөппөн нэһилиэгэр Олег Лебедев аатынан «Дьулуур” күрэс саалатыгар көҥүл тустууга Өрөспүүбүлүкэ оҕолорго аһаҕас турнирын көбүөрэ тэлгэннэ. Манна барыта 25 хамаанда кэлбит, 172 кэскиллээх бөҕөстөр түһүлгэҕэ таҕыстылар.

Саха Өрөспүүбүлүкэтин үтүөлээх тириэньэрэ Олег Лебедев сырдык кэриэһигэр уонна II Дьөппөн нэһилиэгин дьаһалтатын бирииһигэр  оҕолорго көҥүл тустууга күрэхтэһии олохтоох көҕүлээһини өйүүр бырагыраамаҕа ситиһиилээхтик кыттаннар тэрилиннэ. Күрэхтэһиини арыйыы үөрүүлээх тэрээһинигэр иитиллээччилэрэ СӨ физическэй култуураҕа уонна успуорка миниистирэ Леонид Спиридонов, Ил Түмэн дьокутаата Тихон Скрябин, Хаҥалас улууһун физическэй култуураҕа уонна успуорка салаатын салайааччыта Виктор Громов, II Дьөппөн нэһилиэгин  баһылыга Ольга Петухова, Олег Лебедев быраата Дмитрий кыттыыны ыллылар. «Дьулуур” күрэс саалата ис өттө анал ойуулаах баннердарынан саҥардыллыбыт, күрэс тэрээһинигэр анаан пьедестал оҥоһуллубут.

Хаҥалас улууһугар көҥүл тустуу сайдарыгар элбэх сыратын, билиитин-көрүүтүн, сатабылын уурбут Олег Лебедев такайбыт, ииппит-эрчийбит уолаттара Россияҕа бастыыр иһин күрэхтэһиилэргэ, «Азия оҕолоро” норуоттар икки ардыларынааҕы спортивнай оонньууларга ситиһиилээхтик кыттыбыттара. Күрэхтэһии кэмигэр ытыктыыр тириэньэрин Олег Лебедев туһунан, икки төгүл сайыҥҥы олимпийскай оонньуулар кыттыылаахтара, Аан дойду призёра, Азия чөмпүйүөнэ, СӨ физическэй култуураҕа уонна успуорка миниистирэ Леонид Спиридонов истиҥник ахтан-санаан ааста.

—Олег Дмитриевич Лебедев Хабаровскай куоракка физкультура институтун үөрэнэн бүтэрэн баран манна дойдутугар Күөрдэмҥэ кэлбитэ. Биһиги ол иннинэ Валерий Архипович Скрябиҥҥэ эрчиллэ сылдьыбыппыт. Тириэньэринэн үлэҕэ киирэн, оскуолаҕа кэлэн уолаттары көҥүл тустуу сиэксийэтигэр хомуйталаабыта. Дэриэбинэ оҕото барыта тустуук буолбута. Тустууга эрчиллэрбитигэр кини тириэньэр быһыытынан  олус тэрээһиннээҕэ, кыраҕы болҕомтолооҕо уонна улахан сыаллары туруорара. Сахабыт сирин чөмпүйүөнэ эрэ буолбакка, Россия түһүлгэлэрин кыайыахтаахпыт, Олимпиадаҕа тиийиэхтээхпит туһунан өрүү этэрэ, такайара. Итини таһынан аҥаардас спортсаала дьарыгынан муҥурдаммакка, оҕолору түмэн сайынын эбии эрчийэн спорт лааҕырыгар сырытыннаран, похуоттарга баран, үлэлээн үгүстүк субуотунньуктарга кытыннаран биһиги улаатыннартаабыта.

Олег Дмитриевич оҕону аҥаардас спортсмен эрэ быһыытынан  буолбакка, өйбүт-санаабыт сайдарыгар киэҥ билиилээх дьон буолан тахсарбытыгар, төрөөбүт төрүт дойдубутун таптыыр  киһи буоларбытыгар иитиини улаханнык оҥорбута. Кини иитиллээччилэрин ортолоругар билигин үчүгэй салайааччылар, өрөспүүбүлүкэ таһымнаах норуот дьокутааттара, биисинэс эйгэтигэр ситиһиилээхтик үлэлиир дьоннор бааллар. Сүрдээх улахан, үрдүк таһымнаах үлэни оҥорбут эбит диэн билигин биһиги сыаналыыбыт.

Биһиги Сахабыт сиригэр сүрүннээн биллиилээх спортсменнар ааттарыгар күрэхтэһиилэри ыытабыт. II Дьөппөҥҥө СӨ үтүөлээх тириэньэрэ О.Д.Лебедев сырдык кэриэһигэр маннык таһымнаах күрэхтэһии тэриллэрэ атын улуустарга эмиэ холобур буолар. Манна тириэньэрдэр үүнэн иһэр бөҕөстөрү кытта сыралаах үлэлэрэ көстөр. Тириэньэрдэргэ биир сонун көҕүлээһининэн, кини быраата Дмитрий Лебедев бу турнирга бастыҥ тириэньэргэ убаһаны бириис анаабыта буолар. Онон биһиги тириэньэрбит Олег Дмитриевич үлэлээбит үлэтэ салҕанан, сайдан бара турар. Биһиги нэһилиэк баһылыгар Ольга Петуховаҕа, бары олохтоох биир дойдулаахтарбытыгар “Олохтоох көҕүлээһини өйүүр” бырагыраамаҕа киирсэн, куонкурсу кыайан маннык дьоһуннаах турниры тэрийбиттэригэр улаханнык махтанабыт, — диэтэ Леонид Николаевич.

Эдэр бөҕөстөрү иитиигэ, эт-хаан өттүнэн хатарыыга, өй-санаа өттүнэн кыаҕыралларыгар дьоһуннаах түһүлгэ буолла. Олег Лебедев таһаарыылаахтык үлэлээбит сыллара умнуллубаттар. Бу түһүлгэттэн эмиэ бастыҥ бөҕөстөр үүнэн тахсыахтара. Нэһилиэк дьаһалтата олохтоох көҕүлээһини өйүүр бырагыраамаҕа ситиһиилээхтик кыттан тэрийэн бирииһин олохтоон, маны сэргэ ытык киһилэрэ Олег Лебедев кэриэһигэр ыытыллар турнир үрдүк таһымнаахтык барарыгар аймахтара, биир дойдулаахтара, табаарыстара, ЯПУ-1 бииргэ үөрэммит доҕотторо, үлэ кэлэктииптэрэ, биирдиилээн ыаллар сыаналаах бириистэри туруорбуттар.

Биир саамай кэрэхсэбиллээҕинэн Олег Лебедев быраата Дмитрий бастыҥ көрдөрүүлээх тириэньэргэ Мэҥэ Хаҥалас улууһун Оҕо спортивнай оскуолатын Төҥүлүтээҕи филиалын тириэньэригэр «Турнир бастыҥ тириэньэрэ» анал аат хаһаайыныгар Силин Власовка убаһаны анаабыта буолла. Ыйааһыннарыгар бастаабыт бөҕөстөр чөмпүйүөн курунан, мэтээллэринэн, гармоталарынан, анал бириистэринэн наҕараадаланнылар. Кэлбит хамаандалар бары илии тутуурдаах, махтанан тарҕастылар.

СӨ үтүөлээх тириэньэрэ Олег Лебедев сырдык кэриэһигэр уонна II Дьөппөн нэһилиэгин дьаһалтатын бирииһигэр ыытыллыбыт Өрөспүүбүлүкэ аһаҕас турнирын кыайыылаахтара.

2019 с.т. 33 кг – 1 миэстэ Корнилов Арчын (Нам улууһа)

2018 с.т. 22 кг – 1 миэстэ Наумов Саша (Хаҥалас, Булгунньахтаах)

2017 с.т. 24 кг – 1 миэстэ Явловскай Эрсан (Мэҥэ Хаҥалас, Павловскай)

2017 с.т. 38 кг – 1 миэстэ Магомедов Абдулла (Дьокуускай к.)

2016 с.т. 28 кг – 1 миэстэ Яковлев Аятмар (Дьокуускай к.)

2015 с.т. 30 кг – 1 миэстэ Иванов Павел (Хатас)

2015 с.т. 32 кг – 1 миэстэ Баишев Артур (Мэҥэ Хаҥалас)

2015 с.т. 42 кг – 1 миэстэ Кононов Арчылаан (Хаҥалас, Нөмүгү)

2012 с.т. 46 кг – 1 миэстэ Никифоров Николай (Амма)

2012 с.т. 75 кг – 1 миэстэ Петухов Илья (Хаҥалас, II Дьөппөн)

2011 с.т. 57 кг – 1 миэстэ Собакин Дамир (Чурапчы)

Уйбаан УЙГУУРАП.

Ааптар хаартыскаҕа түһэриитэ.