Ленскэй нэһилиэккэ 8 көрүҥнээх Спартакиада буолла

Ленскэй нэһилиэккэ кулун тутар 4-5 күннэригэр тэрилтэлэр кэрэ аҥардарыгар аан маҥнайгытын I Спартакиада ыытылынна. Икки күн устата барыта 10 киһилээх 18 хамаанда – дартс, хабылык уонна хаамыска, дуобат, саахымат көрүҥнэригэр көрсүбүттэрэ.

Ленскэй нэһилиэккэ ыытыллыбыт I Спартакиада үөрүүлээх арыйыытыгар кэрэ аҥардары баһылык Петр Сокольников икки солбуйааччыларынаан Тимофей Охлопков уонна Петр Владимиров, нэһилиэк депутаттарын председателэ Егор Охлопков буоланнар эҕэрдэлээтилэр. Үөрүүлээх күүтүллүбэтэх быһыы түгэнэ үгэннээн турар кэмигэр, салайааччылар истиҥ ырыа арыаллаах спартакиада бары кыттыылаахтарыгар кэрэ сибэккилэри туттартаабыттара, барыларыгар болҕомто уурбуттара. Күрэхтэһэ диэн кэлбит кэрэ аҥардар күүппэтэх өттүттэн сибэкки тутан соһуйуулара, үөрүүлэрэ үксээбитэ. Биһиги эргин маннык эмискэ соһуччу үөрүү түгэнэ өссө буола илик диэн бэлиэтиирбит сөптөөх.

Былааннаммыт спартакиада хартыыната бүтүннүү ойууланар: үгүс тэрилтэ кэрэ аҥардара бириэмэлэрин сөптөөхтүк аттаран, эппиэтинэс ууран күрэхтэһэ кэлиилэрэ; сөптөөх бириэмэҕэ салалта баар буолуута. Бу буолар, тэрээһин хаамыыта толкуйдаммытын, өйгө оҥоһуллубутун курдук барбыта – икки өттүттэн эрэнии, күүтүү!

Түгэнинэн туһанан, сибэкки ылыытын үбүгэр-харчытыгар биир дойдулаахтарбытыгар махтанабыт: ИП Изюков А.Г., ИП Халдеев Д.А., ИП Шарин Ю.П., ИП Назаров А.А., Нам улууһун булчуттарыгар, Ленскэй нэһилиэк олохтоох дьаһалтатыгар. Махтанабыт, күрэхтэһии киэҥ-куоҥ сиргэ ыытылларыгар, табыгастаах сир-уот анаабыт Нь.С. Тимофеев аатынан республикатааҕы Олимпийскай Эрэл спорт оскуола салалтатыгар, улуустааҕы спорт управлениеҕа. Судьуйаларбытыгар туһунан Надежда Протопоповаҕа, Айсен Касьяновка, Виктор Никоновка, Прокопий Петуховка, Күннэй Эверстоваҕа, Валентина Сокольниковаҕа махтал тыллары аныыбыт. Куруук күүс-көмө буоларгытыгар, илиигитин утары уунаргытыгар барҕа махтал буоллун!

Спартакиаданы хара ааныттан бүтүөр диэри барытын өйүгэр толкуйдаан, төбөтүгэр буһаран, оҥорон таһаарбыт киһибит буолар – спорт эйгэтигэр үгүс сылларга үлэлиир, саҥа сүүрээннэри тохтоло суох киллэрэр, күрэхтэһиилэри эрчимнээх куолаһынан баһылаан-көһүлээн ыытар, убаастыыр салайааччыбыт Иван Яковлев! Иван Васильевич, дьэ, атынтан атын, сонунтан сонун, ураты күрэхтэһиилэри ыытарыттан биир бэйэм соһуйуохпун соһуйабын. Спорт хайысхатыгар бу курдук өйдөөх-санаалаах, үлэҕэ бэриниилээх туруу үлэһиттэри кытта үлэлиирбиттэн киэн туттабын уонна холобур оҥостобун!

Ол курдук, Спартакиада бастакы күнүгэр Общественник дьиэтигэр 2 киһи дартска, биирдии кэрэ аҥар хабылыкка уонна хаамыскаҕа, дуобакка, саахымакка хамаандаларын инники таһаарар инниттэн бары сатамньыларын уурдулар диэххэ наада. Хабылык, хаамыска көрүҥэр бастыҥнар: Намнааҕы социальнай харалта; иккис миэстэ – Намнааҕы иккис нүөмэрдээх оскуола; үһүс миэстэ – “Солнышко” уһуйаан. Дуобат кыайыылаахтара: улуус дьаһалтата; иккис миэстэ – улуустааҕы гимназия; үһүс миэстэ – Намнааҕы алын кылаас оскуола. Саахымат бастыҥнара: “Сулусчаан” уһуйаан; иккис миэстэ – Намнааҕы алын кылаас оскуола; үһүс миэстэ – Намнааҕы иккис нүөмэрдээх оскуола.

Иккис күҥҥэ Култуура-спорт комплекска корнхолга бастыҥнар: 58 очколаах А.Ф. Шестаков аатынан норуот айымньытын дьиэтэ; 44 очколаах Ленскэй нэһилиэк олохтоох дьаһалта; 42 очколаах “Кыталык” уһуйаан. Хомуур күрэххэ: 50 кубигы 34,88 сөк. хомуйбут “Солнышко” уһуйаан; 37,12 сөк. бириэмэлээх “Теремок”; 37,40 сөк. Намнааҕы педколледж. Бу түһүмэххэ күрэхтэһээччилэр бэрт аҕыйах бириэмэ уратылаахтар.

Спартакиада саамай күүтүүлээх көрүҥэ – канаат тардыһыыта! Кэрэ аҥардар канааты тардыбыттара манныгы кэпсиир, суолтаны ыйааһын буолбакка, иҥиир быһаарара. Ону тэҥэ, балачча тэҥ киирсиилэр буолбуттара киһини соһутар: хайалара тулуурдааҕа, канааты тиһэҕэр диэри тардыылара. Бастыҥнар: “Сулусчаан” уһуйаан; иккис нүөмэр – Намнааҕы педколледж; үһүс нүөмэр – Намнааҕы социальнай харалта. Бэлиэтээн эттэххэ, биир бэйэм соһуйбутум, Намнааҕы алын кылаас оскуолатын, Намнааҕы Ис дьыала хамаандаларыгар биир да киппэ көрүҥнээх кэрэ аҥар суоҕуттан уонна тимир курдук тутан туралларыттан.

Ити курдук, 8 көрүҥнээх I Спартакиада түмүгүнэн, хабылыкка, хаамыскаҕа – 8, дартска – 2, дуобакка – 3, саахымакка – 2, лазернай винтовканан ытыыга – 5, корнхолга – 11, хомуур күрэххэ – 3, канаакка – 7 миэстэлэри ылаттаан 41 очколаах Намнааҕы алын кылаас оскуолата кыайыылааҕынан ааттаммыта!

Иккис үрдэлгэ, хабылыкка, хаамыскаҕа – 5, дартска – 3, дуобакка – 4, саахымакка – 11, лазернай винтовканан ытыыга – 3, корнхолга – 16, хомуур күрэххэ – 4, канаакка – 2 миэстэлэрдээх, барыта 41 очколаммыт Намнааҕы педагогическай колледж тахсар!

Үһүс үрдэлгэ, хабылыкка, хаамыскаҕа – 2, дартска – 4, дуобакка – 11, саахымакка – 3, лазернай винтовканан ытыыга – 10, корнхолга – 9, хомуур күрэххэ – 9, канаакка – 5 миэстэлэри ситиһиэн 53 очкону көрдөрбүт Намнааҕы иккис нүөмэрдээх оскуола тахсар!

Миэстэлэр маннык салҕаналлар: Намнааҕы социальнай харалта (59), Ленскэй нэһилиэк олохтоох дьаһалтата (64), “Солнышко” уһуйаан (70), “Сулусчаан” (70), улуустааҕы дьаһалта (74), улуустааҕы гимназия (77), “Намкоммунтеплоэнерго” (77), А.Ф. Шестаков аатынан норуот айымньытын дьиэтэ (78), “Кэнчээри” уһуйаан (78), Намнааҕы Ис дьыала (84), “Теремок” уһуйаан (85), “Кыталык” (90), “Чэчир” (98), Т.К. Ядрихинская аатынан Намнааҕы социальнай-геронтологическай киин (105), Намнааҕы үһүс нүөмэрдээх оскуола (121).

Ленскэй нэһилиэккэ кэрэ аҥардарга Спартакиада саҥа саҕаланыыта эрэ диибит. Дьэ, бу сылтан ыла Спартакиада кыаҕын ыллар ылан истин, элбэх күрэхтэһээччилэрдээх буола үүнэ-сайда атаҕар тура таҕыстын! Саамай сүрүнэ, маннык күрэхтэһиилэргэ дьон үөрүөхтээх-көтүөхтээх, бэйэ-бэйэтин билсиэхтээх, биир буолуохтаах!

Харысхан ПОПОВ, Нам.

Ааптар хаартыскалара.