Ленскэй нэһилиэк спорт кыһыҥҥы көрүҥнэрин фестивалыгар

Нам улууһугар нэһилиэктэр икки ардыларыгар ыытыллар комплекснай спартакиада бастакы күрэхтэһиитэ – Альберт Ильин кэриэһигэр IV кыһыҥҥы спорт көрүҥнэригэр фестиваль!

РФ уонна СӨ бочуоттаах тутааччы, Нам улууһун бочуоттаах олохтооҕо, Нам улууһугар элбэҕи оҥорбут баһылыгынан биллэр Альберт Ильин кэриэһигэр ыытыллар күрэхтэһии быйыл 2026 сылга Нам сэлиэнньэтигэр буолла.

Фестивальга Ленскэй нэһилиэк чиэһин хайыһар көрүҥэр эр дьоҥҥо 4, дьахталларга 3, бэтэрээн эр дьоҥҥо 3, бэтэрээн дьахталларга 2 хайыһардьыт; шорт-трекка эр дьоҥҥо, дьахталларга 4 хаҥкыһыт; хоккейга 11 хоккейы сөбүлээччи көмүскээтилэр.

Намнар “кыаллыбат диэн суох” диирбитинэн, дьэ, “маладьыас” дьоммут! Ол курдук, бу күннэргэ соһуччу уулларыы буолан, хоккей Дьокуускайга ыытыллынна. Кылгас бириэмэҕэ 6 хамаанда бары быһаарына охсон Дьокуускайга киирэн оонньообутун, бэйэбитигэр туһунан кыайыы диэм этэ. Спорт эйгэтигэр үлэни туох да иһин, тиһэҕэр тиэрдэн баран тэйэр орто, аҕам саастаах убаастабыллаах үлэһиттэр баалларыттан маннык хартыына тахсан кэлэр.

Буолар тэрээһиннэр, күрэхтэһиилэр нэһилиэнньэҕэ умнуллубат өйдөбүллэри хаалларыахтаахтар. Холобура, Ленскэй нэһилиэктэн хайыһарга оскуола үөрэнээччилэртэн аҕам саастаах хайыһардьыттарга тиийэ сибиэһэй салгынынан тыыннылар, нэһилиэктэригэр наадалаах очколары аҕалбыттарын бэлиэтиибит. Хоккеистарбытыгар эмиэ бу курдук, билиҥҥи көлүөнэ ыччаты кытта тэҥҥэ хоккейдыыр дьоннордоохпутуттан киэн туттабыт, махтанабыт!

Шорт-трек көрүҥэр, хаҥкыны ким хайдах сатыырынан тэбэр, инникитин даҕаны дьоммут-сэргэбит мууска хаҥкылыыр сатабылларын тупсарыахтара, сүүрэр таһымнарын үрдэтиэхтэрэ, бириэмэҕэ үлэлиэхтэрэ.

Альберт Ильин кэриэһигэр IV кыһыҥҥы спорт көрүҥнэригэр фестивальга Ленскэй нэһилиэк хоккейга – 3, шорт-трекка – 3, хайыһар сүүрүүтүгэр – 4 миэстэлэри ылан, бэйэтин бөлөҕөр 3-с бочуоттаах миэстэҕэ таҕыста. Чопчулаатахха, иккис миэстэлээх Хамаҕаттаны кытта очкобут тэҥнэһэн хаачыстыбанан баһыйтарыы баар. Ситиһии кэлэригэр Ленскэй нэһилиэк олохтоох дьаһалтатыгар, суоппарбытыгар махтанабыт!

Харысхан ПОПОВ.

Нам.