Кыайыылаахтар өрөгөйдөрө – 24 хамаанда дротик бырахта

Ленскэй нэһилиэк тэрилтэлэрин икки ардыларыгар иккис көрүҥ – дартс кулун тутар 17-18 күннэригэр Общественник дьиэтигэр буолла. Бастакы күҥҥэ улахан тэрилтэлэр, иккискэ дьоҕустар бастыыр иһин күрэхтэстилэр.

Дартс күрэхтэһиитигэр улаханныын-кыралыын барыта 20 тэрилтэттэн 24 хамаанда кыттыыны ылла. Бу үчүгэй сыыппара!

Улахаттарга финалга тахсан мэтээл ылар иһин “Намкоммунтеплоэнерго” күннүөн күннээтэ: НКТЭ-2 хамаандата финалга 5956 очкону ылан кыһыл көмүс, НКТЭ-1 хамаандата 5871 очколанан үрүҥ көмүстэри кэттилэр. Боруонса мэтээллэр Намнааҕы педагогическай колледж (5693) дартсменнарыгар бардылар.

Күрэхтэһиигэ зачет маннык: 1 м – НКТЭ-1; 2 м – НПК; 3 м – Намнааҕы гимназия (5268); 4 м – Намнааҕы 2-с нүөмэрдээх оскуола (4822); 5 м – “Сахатранснефтегаз” (5260), (4178); 6 м – Намнааҕы 3-с нүөмэрдээх оскуола (4621); 7 м – улуустааҕы дьаһалта (4578); 8 м – Ленскэй нэһилиэк олохтоох дьаһалтата (4462); 9 м – “Сулусчаан” уһуйаан. “Сулусчаан” уһуйаан үлэһиттэрэ бары күрэхтэһиигэ күүстээх, мөлтөх көрүҥмүт диэн аахсыбакка хайдах, туох сатыылларынан кэлэннэр күрэхтэһэллэрин холобур гынан хайгыахха эрэ сөп.

Иккис бөлөххө улуустааҕы социальнай харалта, Намнааҕы “Якутлесресурс” иккилии хамаандалары туруораннар барыта 14 хамаанда дротик бырахта. Бу сырыыга финалга “Якутлесресурс” икки хамаандата тахсан көрүлүө диэбиппитин атыттар оннук гыннарбатылар. Кыһыл көмүстэр Намнааҕы алын кылаас оскуолатыгар (5634), үрүҥнэр “Якутлесресурс-1” (4705), боруонсалар Намнааҕы ойуур хаһаайыстыбатыгар (4359) хаһаайыттарын буллулар. Күрэхтэһиигэ зачет: 1 м – Намнааҕы алын кылаас оскуолата; 2 м – “Якутлесресурс”; 3 миэстэ – Намнааҕы ойуур хаһаайыстыбата; 4 м – “Ростелеком” (4683), (4037); 5 м – А.Ф. Шестаков аат. улуустааҕы норуот айымньытын дьиэтэ (6008), (3582); 6 м – Н.С. Тимофеев аат. республикатааҕы Олимпийскай эрэл спорт оскуолата (4277); 7 м – “Кыталык” уһуйаан (3758); 8 м – “КуБИТ” (3752); 9 м – улуустааҕы социальнай харалта (3607); 10 м – Социальнай фонд (3442); 11 м – “Чэчир” уһуйаан (3207); 12 – “Теремок” уһуйаан (2921).

“Лидер” спорт киин ыытар күрэхтэһиилэрэ үксүлэрэ, хайаан барыта биир халыыпка кутуллубут курдук буолуохтарай диэнтэн куруук уратылаахтарынан аатыраллар. Холобура, корнхол уонна дартс биирдэ эрэ быраҕыынан буолбакка, күрэхтэһээччилэр сатабылларын финалынан салҕанан дьиҥ чахчы көрдөрөр. Ону тэҥэ, манныкка хамаанда төһө тулуурдааҕа, холкутук ылынара көстөн кэлэр. Ыытыллар күрэхтэһиилэргэ тэрилтэлэр биирдэ мустубучча, болҕомтолорун күрэхтэһиигэ уураллара сөптөөҕүнэн ааҕыллар.

Күрэхтэһии ойуулааһыны бэйэтэ көрдүүр уонна ирдиир: маассабаһы, үлэһит күннээҕи түбүктэн аралдьыйыытын, сэргэхсийиитин, олохтоохтор бэйэ-бэйэлэрин кэпсэтэн-ипсэтэн, көрөн билэр буолууларын. Бу барыта “түмсүү” диэн тыл сорҕотунан ааттанар!

Тэрилтэлэр бэйэлэрэ да этэллэринэн, сыл саҕаланыаҕыттан тэрилтэлэр икки ардыларыгар тыҥааһыннаах күрэхтэһиилэр саҕаланнылар. Аҥардас икки көрүҥ ыытыллыбытыттан, өрө күүрүү, өрүкүнүйүү, оргуйуу, кыра мучумаан баар. Санаа хайдыһыыта кэпсииринэн, ким эрэ наар кыайыынан муҥурданыан баҕарар, хайалара эрэ күрэхтэһииттэн бэйэтигэр чуумпурууну, сынньалаҥы ыларын бэлиэтиир. Сыл устата “Лидер” спорт киин 10-тан тахса көрүҥҥэ күрэхтии ыытыахтааҕын тоһоҕолоон бигэргэтэбит. Ол курдук, эр дьоҥҥо, дьахталларга волейбол; хабылык, хаамыска; хайыһарынан сүүрүү; чэпчэки атлетика; ГТО; мини-футбол; дуобат; саахымат; буулдьанан ытыы; остуол тенниһэ; канаат тардыһыыта былааҥҥа турар.

Спорт эйгэтигэр сүрүннээн, күрэхтэһии кэмигэр сөптөөх мөккүөр таһааран бараннар, тиһэҕэр биир тылы булуулара – бэйэтэ Кыайыы! Куруук маннык буола турдун!

Харысхан ПОПОВ.

Ааптар хаартыскалара.