Ким да дуоһуйбата                  

Кулун тутар 2-3 күннэригэр түргэн саахымакка республика хамаанданан чемпионата буолан ааста. Күрэхтэhиигэ былырыыҥҥы курдук эмиэ уон эрэ хамаанда кытынна: Мэҥэ-Хаҥалас, Нам, Ньурба, Таатта, Cунтаар, Хаҥалас, Уус-Алдан, Үөһээ-Бүлүү, Чурапчы уонна киин куорат.

Биэстии дуоскаҕа 50 кыттааччылар 9 турга круговой системанан күрэхтэстилэр. Рейтинг-фаворит былырыыҥҥы кыайыылаах Сунтаар хамаандата (Арсений Чумаевскай, Руслан Пахомов, Павел Григорьев, Арина Васильева, Айыына Егорова) эрэллээх састаабынан кытынна, атын хамаандалар эксприментальнай састаабынан киирсэн күүстэрин бэрэбиэркэлээтилэр. Эрдэ сабаҕалааhынан ордук рейтинговай көрдөрүүлэринэн Сунтаар улууһа уонна киин куорат чемпион аатын былдьаhаллара, онтон үhүс миэстэни Уус-Алданнар ылаллара сэрэйиллибитэ.

Кыайыылааҕынан киин куорат хамаандата (Владислав Жирков, Дмитрий Егоров, Вячеслав  Гаврильев, Полина Пак, Галина Эверстова) ахсыс турга уус алданнардыын кэпсэтиһэн оонньооботулар уонна бүтэһик турга хаҥаластары кытта тэҥнэһэн,атыттары кыайталаан, 16 очколаах бастаата. Кыайыылаахтарга иккис турга хотторбут итиэннэ сэттис турга уус алданнары кытта тэҥнэспит, атын хамаандалары  кыайталаабыт сунтаардар 15 очукуоланан иккис миэстэҕэ таҕыстылар. Республика чемпиона А.Постников капитаннаах Таатта хамаандата кинилэртэн үнтү сынньылыннылар. Маннык улаханнык хотторуу турнирга биирдэ эрэ буолан соһутта. Сунтаардар дьиҥ күүстэрин  биирдэ эрэ көрдөрдүлэр дуо диэн буолла.

ҮҺүс турга намнарга, төрдүс турга мэҥэлэргэ хотторбут итиэннэ иккитэ тэҥнэспит уус алданнар (Семен Местников, Айсен Федоров, Дьулусхан Васильев, Евдокия Избекова, Ньургуйаана Баишева) уон икки очукуолаах үһүс миэстэни  ылла. Үс кэнники дуоскалар оонньооччулара ситиһиилээхтик кытыннылар. Төрдүс миэстэни былырыыҥҥы онус миэстэлээх Ньурба хамаандата 9 очукуоланан ылыыта соһуччу буолла, C.Верховцев опыттаах К.Филипповы (Чурапчы) кыайыыта турнир биир бастыҥ партиятынан сыаналыахха сөп.

Кыайыылаахтарга итиэннэ атын бары хамаандаларга састааптарыгар проблемалар баалларын турнир көрдөрдө. Рейтинг көрдөрүүтүнэн бэһис миэстэлээх хаҥаластар сэттис миэстэҕэ, алтыс миэстэлээх үөһээ бүлүүлэр бүтэһиккэ тэбилиннилэр. Бэһис-алтыс миэстэлээх Нам уонна Таатта хамаандалара былырыыҥҥы көрдөрүүлэрин кыратык тупсарбыттара бэйэлэрин астыннарбата саарбахтаммат. Былырыын төрдүс-бэһис миэстэлэммит мэҥэлэр уонна чурапчылар мөлтөхтүк кытыннылар, итиэннэ ахсыс-тохсус буоллулар.

Онон бу генеральнай репетиция курдук буолбут чемпионат хайа да хамаанданы астыннарбата итиэннэ састааптары күүһүрдэргэ сорук туруорда. Эһиилги сылга хамаандалар ахсааннара лаппа эбиллиэхтэрэ уонна өссө тыҥааһыннаах киирсиилэр буолуохтара. Күрэхтэһии сабыллыытыгар Физкультура уонна маассабай спорт управлениетын салайааччытын солбуйааччы Святослав Скрябин республикаҕа саахымат кэнники сылларга өрө тахсан иһэрин уонна эдэр оонньооччулар оруолларын бэлиэтээтэ.

Петр ЯКОВЛЕВ, күрэхтэһии судьуйата.