Хотугу дэгит күрэскэ…

Оҕолорго уонна ыччаттар ортолоругар түөрт күн устата барбыт уһун унньуктаах күрэхтэһии киин куоракка ыытыллан түмүктэннэ.

Дьэ, чахчы хоһуун санаалаах, элэйбэт иҥиирдээх, сылайбат сындааһыннаах дьон күрэстэһэр көрүҥнэрэ. Манна хотугулуу үстэ төхтүрүйэн ыстаныы, мэһэйдэрдээх сиринэн сырсыы, сүгэни кыыратыы, маамыкталааһын, наарта үрдүнэн ойуоккалааһын курдук уустук күрэстэр бааллар. Күрэхтэһии «Модун» уораҕайынан, Күөх хонуунан ыытыллан баран, 1-кы нүөмэрдээх ДЮСШ киэлитигэр силигэ ситтэ.

Многоборье сууматынан республикаҕа бастыҥнар ааттара быһаарылынна.

16-17 састаахтарга: Любовь Михайлова (Үөһээ Бүлүү), Эдуард Ксенофонтов (Горнай);

14-15 саастаахтарга: Лариса Мальцева (Нерюнгри), Эрсан Матвеев (Чурапчы);

12-13 саастаахтарга: Ирена Попова (Анаабыр), Айсан Бомбоев (Чурапчы);

11-дээх уонна онтон кыра оҕолорго: Лиона Филиппова (Дьокуускай), Дархан Захаров (Үөһээ Бүлүү).

Хамаанданан уопсай түмүккэ инники күөҥҥэ Үөһээ Бүлүү улууһа таҕыста, иккис миэстэҕэ Горнай, үһүскэ — Чурапчы.

Маны сэргэ 14-15 саастаах оҕолор көрдөрүүлэрэ Үөрэнээччилэр спартакиадаларын ахсааныгар ааҕылынна. Онно хамаанданан Таатта улууһа бастыҥ буолла. Иккискэ — Анаабыр, үһүскэ — Горнай улууһа.

Күрэхтэһиигэ барыта 19 хамаанда, 149 эдэр спортсмен кытынна. Бас судьуйанан Чурапчыттан Семен Колодезников, сүрүн сэкирэтээринэн Анатолий Попов (Нерюнгри), техническэй делегатынан Иннокентий Кузьмин (Дьокуускай) үлэлээтилэр.

Гаврил СТРУЧКОВ.

Ааптар түһэриитэ.