Эдэрдэргэ республика күрэхтэһиитэ

Кулун тутар 18 күнүгэр М.К. Аммосов аатынан Уһук-Илиҥҥи Федеральнай университет тустуутун саалыгар, 23 саастаах ыччаттары хабан туран, көҥүл тустууга республика күрэхтэһиитэ бэрт тэрээһиннээхтик ыытылынна.

57 кг Сунтаар ыччата, Олимпийскай солбуһугу бэлэмниир училище үөрэнээччитэ Роман Кириллин – Анатолий Иванов (Чурапчы), Данил Мохначевскай (училище), Михаил Осипов (училище) курдук куруутун тэҥҥэ хатыһар уолаттарын кэннигэр хаалларан бастаата.

61 кг Олоохуна Токотуттан кэлэн училище кыһатыгар уһаарылла сылдьар Артур Макаров финалга университет бөҕөһүн Дамир Явловскайы тустуу бүтэн эрдэҕинэ, албас оҥорон биир баалынан чорбойон кылбардык кыайда.

65 кг ыччаттарга Россия икки төгүллээх призера Эдуард Попов (Чурапчы института) тэҥнээҕин булбакка бастаата.

70 кг Эдуард инитэ Артур Попов тэҥ хапсыһыыларга түмүктээх бүтэһик албастары оҥорон, чемпион үрдүк аатын ылан инникэлээҕин итэҕэттэ.

74 кг Нам ыччата Игорь Матвеев холкутук бастаата.

79 кг финалга Россия икки төгүлээх призера Владимир Бояновскай (Үөһээ Бүлүү) эдэр уолу – Нозим Сафаровы (Дьокуускай Мархата) иккис түһүмэххэ баһыйа тутан кыайда.

Муҥур ыарахан ыйааһыҥҥа Мииринэй талыы ыччата Евгений Аронов дьиэк биэрбэккэ холкутук бастаата.

Кытайтан, Ис Монголияттан икки монгуол уола 70 кг уонна 74 кг тустан күүстэрин холостулар. Былааннаахтык уонна утумнаахтык дьарыктаннахтарына, Азия чемпионатыгар күүстээхтэр ахсааннарыгар киирсэр туруктаахтар.

Республика эдэр судьуйалара В.Кривошапкин, В.Алексеева-Барашкова, Дь.Сивцев, К.Лиханова, Нь.Тистяхов, саҥа саҕалаан эрэр А.Фокинов уонна да атыттар, күрэхтэһиини мөккүөрэ суох үрдүк таһымнаахтык сууттаабыттарын бэлиэтиир тоҕоостоох.

Тустууну сэҥээрэр Максим АФАНАСЬЕВ.