Бухатыырдар тустууларын сөргүтүөххэ!

Кулун тутар 11 күнүгэр, Кэбээйигэ – «Ысыах Олонхо в Кобяйском улусе: хранители традиции, озерная культура, творческие индустрии» XVI республикатааҕы научнай-методическай конференция буолан ааста.

Манна, спорт национальнай көрүҥнэрин секциятыгар эксперт быһыытынан кыттыыны ыллыбыт: Ершов Михаил Михайлович – Манчаары аатынан күрэс төрүт көрүҥнэригэр республикатааҕы киин отделын начальнига уонна мин.

Михаил Михайлович национальнай көрүҥнэрбит билиҥҥи туруктарын, кыһалҕаларын, инникилэрин бэрт сэргэхтик билиһиннэрдэ.

Мин, П.А. Ойуунускай Олоҥхону ырыппыт үлэтигэр баар бухатыырдар тустууларын сөргүтэр үлэ ыыта сылдьарбытын сырдаттым. Биһиги секциябыт кыттыылаахтара, Кэбээйи улууһун спордун эйгэтин үлэһиттэрэ, бухатыырдар тустууларын бэркэ сэргии иһиттилэр.

Секция үлэтин түмүгэр, конференция резолюциятыгар – быйыл Кэбээйигэ ыытыллар Олоҥхо Ыһыаҕын кэмигэр бухатыырдар тустууларын киллэттэрэргэ диэн быһаарынныбыт.

Ол кэннэ, конференция пленарнай мунньаҕын бүтүүтэ, ыйытыктар бэриллэр кэмнэригэр, мунньах салайааччытыгар – СӨ Правительстватын председателин солбуйааччы Местников Сергей Васильевичка – «Сөргүтүллэ сылдьар П.А. Ойуунускай суруйбут Олоҥхо бухатыырдарын тустуута, Олоҥхо Ыһыаҕар киириэ дуо?», — диэн ыйытыкка, кини бэркэ сэргээбитин биллэрдэ уонна кулун тутар ыйы аһарбакка, ити туһугар быһаарыныы ылыах буолла.

Яков ЯКОВЛЕВ, М.К. Аммосов аатынан Хотугулуу-Илиҥҥи федеральнай университет старшай преподавателэ.