Үөрэнээччилэр күрэхтэһэллэр

Олунньу 20-22 күннэригэр үөрэнээччилэргэ хамаанданан бастыыр иһин республика чемпионата буолан ааста. Эдэр шахматист партияҕа оонньууругар 45 мүнүүтэ бэрилиннэ уонна хас хамыытын аайы 30 сөкүүндэ эбилиннэ.

Барыта 20 хамаанда кытынна: Амма, Бүлүү, Горнай, Кэбээйи, Муома, Мэҥэ-Хаҥалас, Нам, Нерюнгри, Ньурба, Сунтаар, Таатта, Томпо, Уус-Алдан, Чурапчы, Хаҥалас, Өймөкөөн, Өлүөхүмэ, Эдьигээн, Үөһээ Бүлүү улуустарыттан уонна киин куораттан. Хамаанда аайы иккилии уол уонна иккилии кыыс кытынна.

Рейтинг-фавориттарынан Киин куорат, Хаҥалас, Таатта, Үөһээ Бүлүү хамаандалара этилэр. Киин куорат хамаандата бастыыра уонна кимнээх призердарынан буолаллара саарбахтаммата.

Түмүккэ бары утарсааччыларын кыайталаан киин куорат хамаандата (Давид Местников, Семен Григорьев, Валерия Слепцова, Алена Румянцева) 18 очукуолаах холкутук бастаата, хамаанда кыттааччылара 30,5 очукуоны хомуйдулар.

Биир хотторуулаах, биир тэҥнэһиилээх Хаҥалас хамаандата (Лернид Каскевич, Уран Белоусов, Анастасия Каплич, Юлианна Никифорова) 15 очукуолаах иккис буолла, кыттааччылар 27 очукуоланнылар.

Иккитэ хотторбут, биир тэҥнэһиилээх Таатта хамаандата (Айвар Колесов, Айтал Павлов, Наталья Михайлова, Лилиана Габышева) 13 очукуону ылан үһүс миэстэҕэ таҕыста, оонньооччулар 25 очукуону хомуйдулар.

Чурапчы хамаандата 12 очколаах төрдүс, Үөһээ Бүлүү 11 очколаах бэһис буоллулар. Мэҥэ-Хаҥалас, Cунтаар, Горнай, Нерюнгри хамаандалара уоннуу очколаннылар, коэффициенынан мэҥэлэр алтыс миэстэҕэ таҕыстылар.

Петр ЯКОВЛЕВ, күрэхтэһии судьуйата.