Василий Алексеев: «Дьулурҕан» куонкурустара күүтүүлээхтэр»

Красноярскайга ыытыллыбыт Иван Ярыгин Кубогар «Дьулурҕан» үгэһинэн, спорду таптааччыларга куонкурус тэрийдэ. Онно кыайыылаахтары уонна биир дойдулаахтарбытыттан кимнээх миэстэлэһиэхтэрин сөбүн таайыы ыйытыылара бэриллибитэ.

Онуоха 20 киһини кэннигэр хаалларан, кыайыылааҕынан Мэҥэ Хаҥаластан почта үлэһитэ Василий Алексеев буолла. Кини – 70 кг Давид Баев, 79 кг Ахмед Усманов, 86 кг Ибрагим Кадиев, 92 кг Аманулла Гаджимагомедов бастыылларын таайбыт уонна Арыйаан Тютрин үһүс, Виктор Рассадин иккис миэстэ буолалларын уот харахха эппит.

Бүгүн кыайыылаахха бирииһэ – «Атлетикс» маҕаһыынтан 2000 солк. суумаҕа туоһу сурук туттарылынна. Бирииһи эрдэ эрэннэрбитин быһыытынан, АГАТУ, Чурапчы улууһун уонна Саха сирин 18-21 саастаахтарга мас-рестлиҥҥэ хамаандатын старшай тренерэ, «Дьулурҕан» тустууга анаан тэрийбит куонкурустарын биэс төгүллээх кыайыылааҕа Айсен Молуков туттарда.

-Василий, эҕэрдэлиибит! «Дьулурҕан» куонкурсугар хас төгүл кыайдыҥ этэй?

— Арааһа, биэстэ-алтата кыайдым буолуо. Хас сыллаахха, ханнык күрэхтэһиилэргэ кыайбыппын өйдөөбөппүн, ордук аан дойду чемпионаттарыгар сылыктааһыннарым табыллааччылар.

Олус үчүгэй, күүтүүлээх куонкурустары тэрийэҕит. Махтал!

«Дьулурҕан» — билигин спорду уонна спорт историятын сырдатар соҕотох хаһыат сыһыарыыта. Саха сиригэр спорду сырдатааччы, көрдөрөөччү дьоннор син бааллар, Айроннар, Хотойдор о.д.а.

Республикабытыгар туспа спортивнай кумааҕы хаһыат баара эбитэ буоллар, олус үчүгэй буолуо этэ. Ол гынан, билиҥҥи олоххо ити ыарахан быһыылаах.

Уолаттарбыт Красноярскайга бэйэлэрин кыахтарынан туһуннулар дии саныыбын. Арай, күрэхтэһиилэрэ аҕыйаҕа таайар быһыылаах. Састаап туһунан этэр буоллахха, эбии өссө Иран хамаандата кэлбитэ буоллар, интириэһинэй буолуо этэ.

Ярыгин турнирын сырдатыы олох үчүгэй. Мин тустууну телефоҥҥа, «Саха» национальнай көрдөрөр-иһитиннэрэр хампаанньа приложениетыгар, «Мамонт» каналга көрдүм.

Өссө төгүл куонкурус кыайыылааҕа Василий Алексеевы уонна бирииһи туруорбут Айсен Молуковы эҕэрдэлиибит! «Дьулурҕаны» кытта өрүү бииргэ буолалларыгар баҕарабыт. Аны маннык тэрээһин Россия тустууга чемпионатыгар анаан тэриллиэ.

Петр ПАВЛОВ.