Теннисистэр киирбит үбү спортивнай саала өрөмүөнүгэр анаатылар

Афанасий Парфенов аатынан спортивнай комплекска Аҕа дойду көмүскээччилэрин күнүн көрсө остуол тенниһигэр улуустааҕы күрэхтэһии буолла. Бэлиэ бырааһынньыгы көрсө 37 киһи күөн көрүстэ. Нэһилиэктэр бары кэриэтэ кыттыбыттара, спорт бу көрүҥэ киэӈ биһирэбили ыларын көрдөрдө.

Бэрдьигэстээхтэн ураты, элбэх спортсмены Октябрьскайтан Константин Потапов киллэрбитин бэлиэтиэх тустаахпыт. Биир халыҥ хамаанданы теннис фаната Семен Скрыбыкин Мытаахтан аҕалтаата. Дьокуускайтан биир дойдулаахтарбыт, спорт бу көрүҥүн мэлдьи инники күөҥҥэ тутар, ыҥырыыбытын ылынар Федор Иванов Николай Жирков, Семен Романов, Владимир Татаринов, саҥа күтүөт уол, остуол тенниһинэн утумнаахтык дьарыктаммыт Владислав Варфоломеев бу да сырыыга үчүгэй оонньуулары көрдөрдүлэр.

Теннис күрэҕэ буоларын истэн, киин куораттан Михаил Уйгуров тиэтэл бөҕөнөн хомунан кэлэн, куһаҕана суохтук кытынна. Хата, спортивнай саала теннисистэргэ үчүгэй баҕайытык үлэлии турар эбит диэн хайҕаан бэлиэтээбитин үөрэ иһиттим. Маннык теннис киинэ бэл улахан улуустарга суох. Онон бу үлэни көҕүлүүр, өйүүр дьоммутугар махтаныах тустаахпыт.

Күрэхтэһиигэ күүстээх оонньооччулар кыттар буоланнар, спорт бу көрүҥүнэн умсугуйан туран дьарыктанар кэрэ аҥардарбыт Антонина Максимова, Светлана Коврова, Надежда Уразбахтина «биһигини көҥүллээӈ, үчүгэй оонньооччулары кытары тургутуһан, уопутуруо этибит» диэн көрдөһүүлэрин тэрийээччилэр быһа гыммакка, кыргыттарбыт астына кииристилэр.

Инники сылларга күрэхтэһии икки бөлөҕүнэн барар эбит буоллаҕына, быйыл Федерация сүбэлэһэн баран,  бастакы, иккис, үһүс бөлөххө араартаан оонньоппута хайа да өттүттэн табыгастаах, санаа ситиилээх буолла. Ону таһынан, саҥа саҕалааччыларга алын финал бэрт тыҥааһыннаахтык барбыта бэлиэтэннэ. Бөлөхтөрүттэн тахсыбатах дьон, кураанах барбакка, астына оонньоон мэтээл кэтэн, үөрдүлэр-көттүлэр.

Саҥа саҕалааччыларга 20 киһи оонньуур баҕалааҕын биллэрдэ. Онно ракетканы саҥа туппут, хаһан эрэ ханна эрэ оонньообут уонна оскуола үөрэнээччилэрэ үс бастыҥ иһигэр киирэр иһин кииристилэр.

Ити бөлөххө I миэстэҕэ Семен Егоров, II Максим  Петров III Михаил Уйгуров таҕыстылар.

Алын финалга: I Мирослав Семенов, II Спиридон Яковлев, III Светлана Коврова.

II бөлөххө (8 киһи): I Владимир Татаринов, II Надежда Уразбахтина, III Артем Сидоров.

I бөлөххө (9 киһи): I Петр Александров II Валентин Петров, III Федор Иванов.

Кыайыылаахтар уонна призердар физическэй култуура уонна маассабай спорт сайдыытын киинин, АМПКИС салалтатын, остуол тенниһин федерациятын, кытары «Бэйэ дьоно» кафе, «Үлэ күүһэ» хаһыат редакциятын, 16 √-дээх Баһаарынай чаас кэлэктиибэ, биирдиилээн дьон олохтообут сыаналаах бириистэринэн наҕараадаланнылар.

«Кыайыыга дьулуурун иһин» номинацияҕа ыалдьыттарбыт Николай Жирков, Семен Романов, Владислав Варфоломеев анал бириистэрин Анджелина Павловаҕа анаатылар.

Спорт бэтэрээннэрэ Анатолий Осипов күрэхтэһиини бэрт болҕомтолоохтук олорон көрдө. Эдэр спортсменнарга теннис спордун историятын билиһиннэрдэ. Оонньуу быыһыгар сыыһаларын-халтыларын быһааран, көрдөрөн, туһалаах сүбэлэри биэрдэ. Кини мэлдьи илии тутуурдаах кэлээччи. Бу күрэххэ, уопуттаах теннисист бэлэҕин Надежда Уразбахтина уонна Федор Иванов тутар чиэстэннилэр.

Сүрүн оонньуулар кэннилэриттэн ууларыгар-хаардарыгар киирбит теннисистэр коммерческай оонньууга бастыҥ ааты былдьастылар. Утарыта күөн көрсүүгэ кыайыы амтанын амсайбыт уолаттар Валентин Петров, Петр Александров хаарды хаамтылар. Василий Алексеев, Антонина Максимова уоскулаҥ бириэмийэлэринэн санаалара көтөҕүлүннэ.

Күрэхтэһиигэ киирбит үбү теннисистэр Афанасий Парфенов аатынан спортивнай комплекс өрөмүөнүгэр киллэрэри толору өйөөтүлэр. Хаачыстыбалаах үлэ кэмигэр ыытыллан, кэлэр сезону үчүгэйдик саҕалыахпыт диэн баҕа санааларын эттилэр.

Кэнники кэмӈэ ыытыллыбыт күрэхтэһиилэри көрдөххө, спорт бу көрүӈүнэн дьарыктаныан баҕалаах дьон үгүс эбит диэххэ сөп. Ол эрэн, сорох нэһилиэктэргэ сөптөөх усулуобуйа суох дииллэр. Холобур, Дьокуускайтан кэлбит уолаттар бары тэрилтэбитигэр дьарыктанабыт дииллэр. Өссө кэрийэ сылдьан, бэйэ икки ардыгар күрэхтэһэн уопутураллар. Киин сиргэ оннук буолуохтаах даҕаны.

Дьиҥэр теннис остуола наһаа, оннук улахан миэстэни ылбат, нэһилиэктэргэ энтузиаст дьон баар буоллаҕына, хайа баҕарар кыаллар боппуруос. Сыаната да удамыр. Аны доруобуйаҕа киһи сааһыттан тутулуга суох олус туһалаах спорт көрүҥэ диэн мэлдьи кэпсэнэр. Манна биир уол, кус күөрэтэрбэр туһалаах, хараҕым эрчиллэ сылдьар, спортиҥынан дьарыктанар спортсменнар бары теннистииллэр диэн эппитин санаан кэллим. Эмиэ да оннук эбит.

Кэлэр сылга Ньурбаҕа Саха сирин норуоттарын оонньуулара ыытыллаары турар. Онно остуол тенниһэ сүрүн көрүҥ быһыытынан киирэр. Бу сылга путевкалар оонньонуохтара. Онно хамаандабыт кыттар быраабы ыларыгар, уопсай үлэ ыытыллан, Горнай аата ааттанарыгар баҕа санаалаахпыт.

Вячеслав АЛЕКСЕЕВ. Горнай

Ааптар хаартыскалара.