Сэргэй Лукин билигин даҕаны инники сылдьар

Красноярскайга ыытыллар Иван Ярыгин Кубогар «Дьулурҕан» үгэһинэн, спорду таптааччыларга куонкурус тэрийдэ. Билэргит курдук, онно кыайыылаахтары уонна биир дойдулаахтарбытыттан кимнээх миэстэлэһиэхтэрин сөбүн таайыы ыйытыылара бэриллибитэ.

Куонкуруска 21 тустууну сэҥээрээччи кытынна. Кинилэргэ, тустууну өрүү кэтээн көрө, ырыта, бэлиэтэнэ сылдьар дьоҥҥо барыларыгар барҕа махтал!

Күрэхтэһии иккис финалларын кэнниттэн сылыктааһыннары тэҥнээн көрдөххө, Сэргэй Лукин, Василий Алексеев, Данил Данилов 6-лыы очукуолаахтар. Оттон Анастасия Алексеева, Степан Г, Вадим биэстии очукуону ылан, кинилэргэ тилэх баттаһан иһэллэр.

Бу түһүмэххэ ааттаммыт дьон биирдии эрэ сөптөөх хоруйдаахтар. Ол, 79 киилэ кыайыылааҕа Ахмед Усмановы сөпкө эппиттэр, оттон сахалартан миэстэлэһии суох. Онон биир да киһи дагестанецтар Башир Магомедов 65 уонна Шамиль Мусаев 125 кг ыйааһыннарга бастыылларын таайбатах.

Куонкурус кыттыылаахтара бэйэҕит билгэлээһиннэргитин dzulurgan.ru сайтка киирэн очукуоларгытын тэҥнээн ааҕа сылдьаргытыгар баҕарабыт. Эрдэ этиллибитин курдук, тэҥнэһии түгэнигэр, ким бэйэтин хоруйун куонкуруска урут ыыппыт – ол бастыыр. Онон, билиҥҥитэ Сэргэй Лукин син биир инникилээн иһэр. Дьэ, куонкурус кыайыылааҕын бүгүҥҥү финаллар быһаараллар.

Кыайыылаахха “Дьулурҕан” тустууга анаан ыыппыт куонкурустарыгар биэс төгүл бастаабыт Айсен Молуков анал бирииһэ туттарыллыаҕа.

Петр ПАВЛОВ.