Саха сирин хамаандата бастыҥынан буолла

Бүгүн Улан-Удэ куораттан үөрүүлээх сонун кэллэ. Уус-уран гимнастикаҕа Уһук Илин чемпионатыгар Саха сирин хамаандатын кыргыттара бастыҥнарынан буоллулар.

«Биһиги көрүҥмүт сайдыытын усталаах-туоратыгар бу бастакы маннык улахан ситиһиибит буолар, — диэн кэпсээтэ, уус-уран гимнастика федерациятын бэрэстэбиитэлэ Екатерина Григорьева. — Онон пьедестал үрдүкү үктэлигэр тахсыбыт кыргыттарбытын хас биирдиилэрин ааттыахпын баҕарабын. Үтүө көрдөрүүнү ситистилэр: Полина Гарбуз, Елизавета Фадеева, Виолетта Алексеева, Нарыйаана Петрова, Кристина Ксенофонтова, Наргиза Демидович.

Бу күөн күрэс спорт маастардарын программаларынан ыытылынна. Кыайыы Саха сирин сүрүн тренерэ, олимпийскай чемпионка Ксения Дудкина сыралаах мындыр үлэтин итиэннэ федерация президенэ Людмила Валерьевна Николаева ахсаабат кыһамньытын, өйөбүлүн түмүгэр кэллэ».

Чемпионат салҕанар. Билигин аны биирдиилээн күрэхтэһиилэр бара тураллар.

Гаврил СТРУЧКОВ.