Саха сирин хамаандата 37 кыһыл көмүс мэтээли ылла

Түөрт күн устата Дьокуускайга барбыт кикбоксинг күрэхтэһиитэ түмүктэннэ. Уһук Илиҥҥи уокурукка бастыҥнары быһаарар түһүлгэҕэ 89 комплект мэтээл оонньонно. Күөн күрэс уһулуччулаах кикбоксер, Сэбиэскэй Сойуустан аан дойду бастакы чемпиона, Ньурба улууһуттан төрүттээх Александр Иванов кэриэһигэр ананна Саха сирин хамаандата барыта холбоон 37 кыһыл көмүһү илдьэ хаалла.

Ол иһигэр «фулл-контакт» дьиссипилиинэҕэ 13-14 саастаах оҕолорго түөрдү, 15-16 саастаахтарга биэһи, 17-18 саастаах юниордарга үһү, улахан дьоҥҥо — түөрдү. «Лоу-кик» көрүҥҥэ 15-16 саастаахтарга алта кыһыл көмүс кэллэ, юниордарга сэттэ, дьахталларга икки, эр дьоҥҥо алта.

Улахан дьоҥҥо Уһук Илин чемпионун аатын Саха сириттэн кимнээх ыллылар?
«Фулл-контакт»: Ангелина Евсеева (70 кг), Денис Баишев (51 кг), Николай Ефимов (60 кг), Вячеслав Голиков (71 кг).
«Лоу-кик»: Надежда Павлова (48 кг), Ангелина Евсеева (70 кг), Денис Баишев (51 кг), Спиридон Антонов (54 кг), Станислав Румянцев (57 кг), Арьян Попов (60 кг), Тимофей Сивцев (63,5 кг), Айтал Петров (75 кг).

Бу күрэхтэһиигэ 29 кыһыл көмүс мэтээл соҕотох кыттааччыга биир даҕаны киирсиитэ суох тигистэ. 20 ыйааһыҥҥа иккилии эрэ кикбоксер баар. Онон күрэхтэһии өйдөбүлэ сымсах соҕус буолла.

Оттон тэрээһин өттүн көрдөххө, барыта орун-оннугар курдук. Ону чемпионат техническэй делегата, Россия кикбоксиҥҥа федерациятын спортивнай дириэктэрэ, аан дойдутааҕы категориялаах судьуйа Ольга Стрижакова даҕаны бигэргэтэр: «Тэрээһин олус үчүгэй, ону ааһан туйгун диэн сыаналыыбын. Туох даҕаны сыыһа-халты, дьиэк тахсыбата. Гала-финал олус бэркэ барда. Уопсайынан даҕаны Саха сиригэр бөдөҥ күрэхтэһиилэри үчүгэйдик тэрийэн ыыталлар».

Ситинник үтүө сыанабылтан киһи үөрэр.

Гаврил СТРУЧКОВ.

Ааптар түһэриитэ.