Саҥа сүүрээни киллэрбит сүрүн турнир

Саҥа сылбыт бастакы ыйын бүтэһик күнүгэр, тохсунньу ый 31 күнүгэр, Нам сэлиэнньэтин спортивнай-культурнай комплексыгар XXVll төгүлүн ыытыллар «Зырянов турнира» диэн ааттаах, норуоттар икки ардыларынааҕы кылаастаах спордун маастара, Европа араас дойдуларын Аан дойдутааҕы турнирдарын кыайыылааҕа, ССРС Сэбилэниилээх Күүстэрин үс төгүллээх чемпиона, ССРС чемпионатын боруонса призера Иннокентий Николаевич Зырянов кэриэһигэр ыытыллар турнир, эмиэ, Красноярскай куоракка «Иван Ярыгин Кубога» Аан дойдутааҕы таһымнаах күрэхтэһии ыытылла турар кэмигэр, оруобуна сөп түбэһэр түгэнигэр тэриллибитэ оруннаах курдук.

Быйылгы турнир хаһааҥҥытааҕар да элбэх кыттааччыны түмпүтэ элбэҕи этэр. Ол курдук, 16 республика хамаандатыттан барыта 372 эдэр уолаттар (2011-2012 сыллаах төрүөх уолаттар) 13 ыйааһыҥҥа үс көбүөрүнэн ыытыллан, чемпионнар уонна призердар ураты быһыылаах Иннокентий Зырянов мөссүөннээх мэтээллэринэн грамоталарынан уонна сыаналаах бириистэринэн наҕараадаланнылар.

Турнирга биир ураты сүүрээни киллэрэн, Партизан нэһилиэгин тыа хаһаайыстыбатын урбаанньыга Владислав Зырянов тренердэр үлэлэрин өссө күүскэ көҕүлүүр идиэйэтин көрдөрдө. Кини, элбэх чемпионнаах хамаанда тренеригэр убаһа туттарыытын сүрүн суолтатынан буолла. Ол курдук, сертификаты хамаанданан бастаабыт элбэх чемпионнаах, В.П. Карпов аатынан Чурапчытааҕы ОСО эдэр тренеригэр Иван Белолюбскайга туттарда.

Ити күн, М.К. Аммосов аатынан культура дыбарыаһын киин библиотекатыгар, «Суол хаалларбыт чаҕылхай тустуук» диэн Иннокентий Зырянов олоҕун кэрчик кэмнэрин сырдатар кинигэтэ киэҥ эйгэҕэ тахсан, дьон махталын ылыан ылла.

Манна бииргэ эрчиллибит уонна үөрэммит доҕотторо, билигин аатырбыт тустуу үтүөлээх маастара Василий Гоголев, Д.П. Коркин тустуу интернатыгар бииргэ үөрэммит доҕоро Егор Аржаков, убай курдук саныыр аҕа-табаарыһа, ССРС Сэбилэниилээх Күүстэрин кубогын үс төгүллээх кыайыылааҕа Михаил Ноговицын, бастакы тренерэ, көҥүл тустууга бэтэрээннэргэ Арассыыйа чемпиона Федот Соловьев, Иннокентий Зырянов бииргэ төрөөбүттэрэ, аймахтара, Үөдэйгэ уонна Чурапчыга бииргэ үөрэммит оскуолатааҕы табаарыстара үтүө истиҥ тылларын эттилэр.

Бу кинигэни хомуйан оҥорбут Алексей Дмитриевич Яковлевка, эдьиийигэр Татьяна Николаевна Зыряноваҕа уонна балтыгар Людмила Николаевна Макароваҕа мустубут дьон үтүө махталларын тириэртилэр.

Бу турниры иккис төгүлүн (аҕата, Николай Николаевич Зырянов хара маҥнайгыттан тэрийбит турнирын) «IRON» экипировка Киинин генеральнай дириэктэрэ, көҥүл тустууга Арассыыйа уонна хапсаҕайга СӨ спордун маастардара Макар Николаевич Зырянов иилээн-саҕалаан тэрийдэ. Кини үгэскэ кубулуйбут турниры өссө кэҥэтэн, Уһук Илин таһымыгар таһаарар баҕа санаалааҕын биллэрдэ.

Түмүккэ кини баҕа санаата туоларыгар биир дойдулаахтара эрэнэ күүтэбит!

Спорт бэтэрээнэ Анатолий СОФРОНОВ — Онтуон.

Нам.