Остуол сахалыы төрүт оонньууларыгар

Манчаары Баһылай аатынан «Модун» күрэс төрүт көрүҥнэрин сайыннарар кииҥҥэ «хабылык» уонна «хаамыска» сахалыы оонньууларга республика чемпионата түмүктэннэ.

Манна 19 хамаандаттан 107 спортсмен, ол иһигэр 21 спорт маастара, мустан саастарынан түөрт бөлөххө хайдыһан илин-кэлин түһүстүлэр. Күрэхтэһии омукпут остуолга оонньуур түҥ былыргыттан кэлбит оонньууларын чаҕылхай тэрийээччитэ, ахсаабат пропагандиһа Андрей Иванович Донской сырдык кэриэһигэр ананар.

— Быйылгы чемпионат уратылаах. Ол курдук, урукку өттүгэр 4 көрүҥҥэ ыытыллар эбит буоллаҕына, быйылгыттан алта көрүҥҥэ ыытабыт, — диэн кэпсиир түһүлгэ бас судьуйата Иннокентий Максимов. — Хабылыгы сэргэ хаамыскаҕа биэстээх тоҥсуур, сэттэлээх тоҥсуур, умсаах, сулус, күөрэгэй диэн күрэстэр бааллар».

Хамаанданан бастыырга муҥутуур толору састааптаах кэлбит Мэҥэ-Хаҥалас, Үөһээ Бүлүү уонна Дьокуускай кыттааччылара бириистээх миэстэлэри үллэстэллэрэ сабаҕаланара. Төһө даҕаны үгүс улуустан толорута суох састаап кэллэр, Иннокентий Петрович кэпсииринэн, остуол сахалыы төрүт оонньуулара сылын ахсын сайдан иһэллэр, хабар ыырдара кэҥээн иһэр. Ол курдук, хотугу улуустар: Анаабыр, Дьааҥы, Эдьигээн кытталлар  Анаабыртан, Эдьигээнтэн спорт маастардара үүннүлэр.

Түмүккэ хамаанданан Мэҥэ Хаҥалас бастакы, Үөһээ Бүлүү иккис, Дьокуускай үһүс буоллулар. Оттон дьахталларга уонна эр дьоҥҥо Аар Дархан ааттарын Аэлита Алексеева (Мэҥэ Хаҥалас) уонна Олег Андреев (Үөһээ Бүлүү) ыллылар.

Гаврил СТРУЧКОВ.

Ааптар хаартыскалара.