Николай Жирков сырдык аатыгар…

153 эдэр боксер киин куоракка түмсэн Үөрэнээччилэр спартакиадаларын чэрчитинэн бастыҥнары быһаарсан эрэллэр.

Күрэхтэһии Саха сирин биир аатырбыт боксерун Николай Жирков кэриэһигэр ананар. Николай Николаевич бэйэтин кэмигэр РСФСР чемпиона, Россия норуоттарын Спартакиадатын кыайыылааҕа, ССРС Сэбилэниилээх күүстэрин чемпиона этэ. Алма-Атаҕа уонна Алжирга норуоттар икки ардыларынааҕы турнирдарга бастакы миэстэни ылан, спорт норуоттар икки ардыларынааҕы кылаастаах маастарын үрдүк аатын сүкпүтэ. Үгүс сыл устата Ис дьыала министерствотыгар үлэлээбитэ, кэккэ сылларга бэйэтин көрүҥэр республикаҕа сүрүн тренердээн бокс сайдыытыгар дьоһун кылаатын киллэрбитэ.

Кини аатын сүгэр күрэхтэһии Дьокуускайга 1-кы нүөмэрдээх оҕо спортивнай оскуолатыгар бүгүн саҕаланна. Турнир сүрүн судьуйатынан Бүтүн Россиятааҕы категориялаах судьуйа Ариян Монастырев (Майа) үлэлиир. Кыайыылаахтар ааттара олунньу 7 күнүгэр биллиэҕэ.

Сарсын күрэхтэһии күнүс 12:00 чаастан саҕаланар.

Гаврил СТРУЧКОВ.

Ааптар хаартыскалара.