Кылыйар кырдал ыҥырар

Улуустааҕы киин библиотекаҕа Василий Фёдорович Посельскай суруйбут итинник ааттаах кинигэтин билиһиннэрдилэр. Бу тэрээһини иилээн-саҕалаан ыыппыт Марфа Кузьмина кинигэ ис хоһоонун, тутулун сиһилии кэпсээтэ.

300 экземплярынан 70х100/16 формакка, “Сайдам” кинигэ кыһатыгар учүгэй хаачыстыбалаах мелованнай кумааҕыга 488 стр аҕыс түһүмэхтээх, элбэх хаартыскалаах бэчээттэммит.

Кинигэ киириитигэр автор сахалалыы атах оонньуутун, онно сыһыаран бэйэтин олоҕун кэрчиктэринэн суруйбутун эппит. Саха Өрөспүүбүлүкэтин спорка министрэ Леонид Спиридонов, ЧФКСИ Президенэ Михаил Гуляев, спорт национальнай көрүҥнэрин ассоцияларын президенэ Александр Ким-Кимэн, тус тренерэ Николай Санников ааҕааччыларга анаабыт суруйуулара киирбиттэр.

Салгыы Олоҕум суола, Атах оонньуута – үйэттэн үйэҕэ, Уһуйбут дьоһун дьонум, Чаҕылхай түгэннэри сырдатан, Куорсуннаах күрэхтэһиилэр, Үлэни уонна спорду дьүөрэлээн, Баһылай Манчаары спартакиадалара, Бииргэ түмсүүлээхтик диэн түһүмэхтэр сааһыланан киирбиттэр.

Василий Посельскай үлэтин сырдатыыга кини пионер, комсомол, партия ииппит байыаһа буоларын эттилэр. Киһи быһыытынан эйэҕэсин, чиэһинэйин, эргиччи талааннааҕын бэлиэтээтилэр. Олоҕун спорка анаабыт чулуу кылыыһыт, радиокомментатор быһыытынан саха норуота билинэр, киэн туттар.

Кини атах оонньуутугар Саха АССР уонна РСФСР спордун маастара, Манчаары бастакы спартакиадатын оҕолорго кылыыга уонна ыстаҥаҕа чөмпүйүөнэ, улахан дьоҥҥо Манчаары, Саха сирин норуоттарын уонна Дальнай Восток, Сибиир спартакиадаларын призера, о.д.а. үрдүк спортивнай ситиһиилэрдээх. Радиокомментатор быһыытынан бэйэтэ туһунан суоллаах-иистээх, сахатын норуота сэҥээрэр, кэтэһэр журналиһа.

Кинигэ тула кэпсэтиигэ улуус дьокутааттарын сэбиэтин салайааччыта Яков Оконешников, кырдьаҕас журналист Иван Пономарев, бииргэ дьарыктаммыт, күрэхтэспит табаарыһа Николай Адамов, бииргэ үөрэммит табаарыстара Герасим Платонов, Павел Федоров — Сомоҕо, спорду тэрийээччи Виктор Дьяконов, Мэлдьэхси тэҥ төрүттээх Венера Габышева, Христина Федулова, кыраайы үөрэтээччи, спорт ветерана Михаил Друзьянов, улуустааҕы култуура отделын салайааччыта Пётр Гуляев, Хадаар нэһилиэгин баһылыга Афанасий Никонов, Хоптоҕо нэһилиэгин баһылыга Алексей Бурцев, комсомолга биир кэмҥэ үлэлэспит Алексей Слепцов тыл эттилэр. Бу дьоһуннаах кинигэ энциклопедия кэриэтэ суолталааҕын, ааҕааччы киэҥ араҥатыгар анаммытын тоһоҕолоон бэлиэтээтилэр.

Автор Василий Посельскай кинигэтин библиотекаҕа бэлэхтээтэ. Убаастабыллаах ааҕааччылар уларсыҥ, сэргээҥ, ааҕыҥ.

Алексей СЛЕПЦОВ.

Чурапчы.