Кыһыҥҥы Олимпиада-2026: Туох, хаһан, ханна?

XXV Кыһыҥҥы Олимпийскай оонньуулар Италияҕа ыытыллаллар. Икки нэдиэлэни быһа аан дойду дьоно-сэргэтэ күрэхтэһиилэри кэтээн көрүөхтэрэ.

Оонньуулары үөрүүлээхтик аһыы сиэрэ-туома олунньу 6 күнүгэр Милан куоракка “Сан-сиро” стадиоҥҥа буолуоҕа. Керлиҥҥа, хоккейга, хайаттан түһүүгэ, салааскалаах спорка барыллааһын күрэхтэһиилэр олунньу 4 күнүттэн саҕаламмыттара.

Оонньуулар ыытыллар сүрүн куораттарынан – Милан уонна Кортина-Д,Амеццо буолаллар. Бу, Италияҕа төрдүс Олимпиада буолар (1956 сыллаахха Кортина-Д,Ампеццоҕа, 2006 сыллаахха Туриҥҥа Кыһыҥҥы, 1960 сыллаахха Римҥэ Сайыҥҥы оонньуулар ыытыллыбыттара).

Быйылгы Олимпиадаҕа 90 дойдуттан үс тыһыынча спортсмен күрэс былдьаһыаҕа диэн сырдаталлар. Кинилэр спорт 16 көрүҥэр мэтээл иһин күөн көрсүөхтэрэ.

Россияттан 13 спортсмен кыттара биллэр. Аан дойдутааҕы Олимпийскай кэмитиэт быһаарыытынан, кинилэр – былааҕа, гимнэ уонна национальнай бэлиэтэ суох кыттыахтара.

Быйылгы Олимпиаданы биһиги аан бастаан «күөх экраҥҥа” буолбакка, интернеккэ көрүөхпүт. Ол курдук, оонньуулары Okko интернет-сервис https://okko.sport көрдөрөр буолла.

“Дьулурҕан”.