Күүстэрэ – түмсүүгэ, кыахтара – сомоҕолоһууга

// Хатаска “ЗахаровФЕСТ” диэн тэрээһин буолан ааста

И.И. Захаров аатынан Хатастааҕы оҕо спортивнай оскуолата саҥа уораҕайга үлэлии киириэҕиттэн кэлэктиип үлэһитин ахсаана элбээн, хабар эйгэлэрэ биир оччонон кэҥээн айымньылаах аартык аана аһылынна.

Ол курдук кэлэктиип уонча киһилээх эбит буоллаҕына, күн бүгүн 40 тахса киһи таһаарыылаахтык, үтүө түмүктэрдээх үлэлиир-хамсыыр. Ол туһугар күннээҕи үлэттэн ураты атын-атын хайысхаларынан үтүө түмүккэ тиийэр интэриэһи тардарга араас ньыманы тутталлар. Олортон биирдэстэрин сырдатыам.

Бүгүн, о.э. 17.02.2026 “Захаров ФЕСТ” диэн ааттаах тэрээһиҥҥэ Дьокуускай куорат спортивнай оскуолалара түмсэннэр:

— И.И.Захаров туһунан сиһилии билистилэр.

— Доруобуйаларынан хаарчахтаах оҕолору кытта үлэлиир тренердэр иһитэннэриилэрин көрдүлэр иһиттилэр уонна сүбэ-ама ыллылар. Бу түһүмэх инклюзивнай үөрэхтээһиҥҥэ ирдэбил оскуола аайы баар буолан, интэриэһи балачча тарта. Бастаан Василий Васильевич Аргунов уопсай билиһиннэриитин кэнниттэн исписэлиистэр кэпсээтилэр.

Манна этэргэ дылы ууну, уоту ортотунан ааһан урут суох көрүҥҥэ (адаптивнай спортка) үрдүк көрдөрүүлэри ситиспит СӨ үтүөлээх тренерэ Константин Дмитриевич Гаврильев уонна кини биир идэлээхтэрэ Аркадий Валерьевич Степанов, Устинова Элеонора Андреевна үлэлэрин уратыларын билиһиннэрдилэр.

—  Уйулҕа үөрэхтээхтэр кэлэн тренердэри кытта үлэҕэ тахсар араас түгэннэргэ хайдах үлэлэһиэххэ сөбүн ырытыстылар. Түһүмэх сүрдээх көхтөөхтүк ааста, ырытыһыы, санаа атастаһыыта, токоолоһон туран быһаарыы баар буолла. Мин санаабар, элбэх мунаах түгэннэргэ көмө буолла.

— Көрүҥнэринэн арахсаннар маастар кылаастары ыыттылар уонна кимиэхэ туох саҥа ньымалар, албастар баалларын атастастылар. Бу түһүмэх ордук тустуу, мас тардыһыы көрүҥнэригэр этэргэ дылы харах уоттаах, сүрэх өрүкүйүүлээх ааста.

—  И.И. Захаров аатынан Хатастааҕы оҕо спортивнай оскуолатын кэлэктиибэ тэрийбит лотереятыгар кыттаннар өттүк харалаах, илии тутуурдаах бардылар. Кылаан бирииһи – СВЧ оһоҕу Хатастан Айлан Николаев сүүйэн үөрүү өрөгөйүн биллэ. Ыалдьыттар даҕаны кураанах барбытылар, тоҥ балыктан саҕалаан сир аһыгар, буспут диэн, тоҥ диэн, кэнсиэрбэлэммит диэн балыкка тиийэ сүүйдүлэр.

— Маны таһынан, саха дьонун сиэринэн чэйдэттилэр.

Тэрээһиҥҥэ кыттыбыт дьон бары үлэлэригэр анаммыт тус көмөнү ааһан биир эйгэҕэ үлэлиир дьоннорун кытта күрэххэ, күөн көрсүһүүгэ буолбакка, ыксаабакка-тиэтэйбэккэ сэһэргэһэн, сүбэ-соргу бэрсэн, күлэн-оонньоон түмсүүлээх-сомоҕолоһуулаах буолуу тыыныгар киирдилэр. Бу туһунан Тулагы 8 нүөмэрдээх оҕо спортивнай оскуолатыттан кэлэ сылдьар Адель Николаевна Мир санаатын үллэһиннэ:

— Бэртээхэй уонна олус наадалаах тэрээһин буолла. Тэрийээччилэр бу күнү бары өттүттэн көрөн, үрдүк таһымҥа ыыттылар диэн бэлиэтиэм этэ. Дьиэлэрэ-уоттара ырааһа, сылааһа, дьоно-сэргэтэ эйэҕэһэ наһаа үчүгэй. Кэлэктиипкэ ил-эйэ, бииргэ буолуу тыына киириэххиттэн биллэр. Оттон тэрээһини этэр буоллахха, сыалын-соругун ситтэ дии саныыбын. Үлэ-хамнас ньымаларыгар, албастарыгар туһуламмыт буолан көмөтө элбэх буолла. Дьиҥэ барытын билэр курдук эрээригин, этэргэ дылы, кинигэҕэ суруллара биир, онтон олоххо буолара атын буоллаҕа. Онон маннык сүбэ-ама ылар олох үчүгэй дии саныыбын.

Сардаана Николаевна Константинова:

— Бу тэрээһини тэрийсибит дьоннортон биирдэстэрэ буоларым быһыытынан, айбыт-туппут үлэбит этэҥҥэ ааспытыттан ис сүрэхпиттэн үөрэн олоробун. Сыалбытын-сорукпутун ситтибит дии саныыбыт. Аан бастакы буолан буолуо, кэллиэгэлэрбит кэлиилэрэ наһаа маассабай буолбата. Ол гынан, кэлбит дьонтон ким даҕаны кэмсиммэтэ, төттөрүтүн үөрэн-көтөн, махтанан бардылар. Бары сертификаттаах, уопут атастаһыы туһунан туоһу суруктаах бардылар. Бу эмиэ үлэҕэ наһаа наадалаах түгэн буоларын билэбит. Маннык тэрээһиннэр кэлэктииби түмэр, сомоҕолуур күүстээхтэр.

Дьэ кырдьыга да оннук. Баишев Анатолий Михайлович салайааччылаах И.И. Захаров аатынан Хатастааҕы оҕо спортивнай оскуола кэлэктиибэ биир ыал курдук ил-эйэ тыыннаах. Бу тэрээһин иннигэр сүрдээх элбэх бэлэмнэнии үлэтэ баран, сабыс-саҥа стендэлэр оҥоһуллубуттар, суунуу-тарааныы, хомунуу-иминии, сааһыланыы буолбут. Бу күн кэлэктиип 100 бырыһыан кэлэн, бары эппиэтинэстээх анал түһүмэхтэринэн эппиэтинэстээхтик үлэлээтилэр-хамсаатылар.

Түмүккэ дьэ кырдьыга даҕаны норуот муудараһа этэринии, И.И. Захаров аатынан Хатастааҕы оҕо спортивнай оскуола күүстэрэ – түмсүүгэ, кыахтара – сомоҕолоһууга диэн санааҕа кэлэҕин.

Наталья РУФОВА.

Хатас.