«Хаҥалас хапсаҕайыгар» 500 бөҕөс күөн көрсүөҕэ

«Хаҥалас хапсаҕайа» омуктар икки ардыларынааҕы күөн күрэс көбүөрэ Дьокуускайга иккис төгүлүн тэлгэннэ. Сарсын сарсыарда 9 чаастан саҕалаан икки күн устата 500-тэн тахса бөҕөс ким бэрдин быһаарсыахтара.

Бу бөдөҥ тэрээһиҥҥэ анаммыт пресс-конференцияҕа физкультура уонна спорт министрэ Леонид Спиридонов саха омук тустуута Аан дойдутааҕы көс омуктар оонньууларын тосхолугар киирбитин иһитиннэрэн туран: «Бу түһүлгэни тэрийээччинэн Хаҥалас улууһун дьаһалтата, ону сэргэ Хапсаҕай норуоттар икки ардыларынааҕы федерацията буолаллар, биһиги өйүүбүт, көмөлөһөбүт», — диэн бэлиэтээтэ.

Хапсаҕай норуоттар икки ардыларынааҕы федерациятын президенэ Вячеслав Нестеров кэпсээбитинэн, бу сырыыга омук дойдуларыттан итиэннэ атын регионнартан сүүсчэкэ бөҕөс кыттыыны ылыаҕа. Ону таһынан, быйыл хапсаҕайга Россия чемпионата уонна хамаанданан дойду Кубога ыытыллара былааннанарын иһитиннэрдэ.

Тус бэйэм икки ыйытыыбар маннык хоруйдары ыллым:

— Бу күрэхтэһии урукку өттүгэр Покровскайга ыытыллара, олохтоохтор суохтаабыттар, күүтэр-кэтэһэр түһүлгэбит этэ дииллэр. Улууспутугар «Хаҥалас хапсаҕайа», эбэтэр атын турнир ыытыллара буоллар диэн баҕалаахтар.

Хаҥалас улууһун баһылыга Сергей Гребнев: «Кырдьык, бу турнир Покровскайтан саҕаламмыта, сыл ахсын ыытыллара, дьон сөбүлүүрэ, көһүтэрэ. «Хаҥалас хапсаҕайа» үрдүк таһымҥа таҕыста, биһиэхэ бачча улахан тэрээһини ыытар дьиэбит-уоппут суох. Сотору улууска Манчаары оонньууларыгар аналлаах улахан тутуулар дьэндэйиэхтэрэ. Дьэ оччоҕуна аан дойдутааҕы күрэхтэһиини тэрийиэхпит дии саныыбын», — диэн хоруйдаата.

Ону таһынан кэлбит ыалдьыттартан бэйэлэригэр хапсаҕайга күрэхтэһиилэри ыыталларын ыйыппыппар, Индия бэрэстэбиитэлэ икки сыл тэрийбиттэрин эттэ, быйыл 200-тэн тахса киһи күрэстэспит эбит. Узбекистан бэрэстэбиитэлэ сэһэргээбитинэн, кинилэр бэйэлэрин «уч кураш» диэн тустууларыгар чемпионаттарыгар, хапсаҕайга икки-үс ыйааһыҥҥа тустууну киллэрэллэр эбит.

Дьэ ити курдук, сахабыт хапсаҕайа эйгэтин сыыйа кэҥэтэн иһэр.

Гаврил СТРУЧКОВ.

Ааптар хаартыскалара.