“Дьулурҕан” куонкурсун кыайыылааҕа – Василий Алексеев!

Красноярскайга ыытыллыбыт Иван Ярыгин Кубогар «Дьулурҕан» үгэһинэн, спорду таптааччыларга куонкурус тэрийдэ. Билэргит курдук, онно кыайыылаахтары уонна биир дойдулаахтарбытыттан кимнээх миэстэлэһиэхтэрин сөбүн таайыы-ыйытыылара бэриллибитэ.

Куонкуруска 21 тустууну сэҥээрээччи кытынна. Кинилэргэ, тустууну өрүү кэтээн көрө, ырыта, бэлиэтэнэ сылдьар дьоҥҥо барыларыгар барҕа махтал!

Күрэхтэһии түмүктүүр, үһүс күннээҕи финалларын кэнниттэн сылыктааһыннары тэҥнээтэххэ, Василий Алексеев, Анастасия Алексеева уонна Степан Г 8-лыы очукуону хомуйдулар. Оттон икки туур түмүгүнэн бастаан испит Сэргэй Лукин 7 очукуолаах төрдүс көрдөрүүлэннэ.

Дьэ онон, биһиги куонкуруспут эмиэ ханнык баҕарар күрэс күүрээнин курдук, сытыы, тыҥааһыннаах киирсиилээх буолла. Лукин бастаан испитэ ээ, ол эрээри, быһаарыылаах түгэҥҥэ Алексеев уһулу ойон таҕыста…

Куонкурус кыттыылаахтара бэйэҕит билгэлээһиннэргитин dzulurgan.ru сайтка киирэн очукуоларгытын тэҥнээн, ааҕан көрөргүтүгэр уонна куонкурус тэриллиитигэр, усулуобуйатыгар бэйэҕит санааҕытын биллэрэргитигэр баҕарабыт.

Онон эрдэ этиллибитин курдук, тэрээһин балаһыанньатын быһыытынан, бэйэтин хоруйун урут ыыппытынан, «Ярыгин Кубога-2026» куонкуруска Майаттан Василий Алексеев бастаата. Кинини бүтэһик түгэҥҥэ, Ибрагим Кадиев (86 кг) уонна Аманулла Гаджимагомедов (92 кг) бастакы миэстэни ыланнар – кыайыылаах оҥордулар диэххэ сөп.

Василийы эҕэрдэлиибит! Манна даҕатан эттэххэ, кини «Дьулурҕан» бэриниилээх ааҕааччыта, биһиги куонкуруспут хас да төгүллээх кыайыылааҕа. Бу, хас даҕаны сыллаах тохтобул кэнниттэн өссө төгүл бастаата.

Кыайыылаахха бу күннэргэ, “Дьулурҕан” куонкурустарыгар биэс төгүл бастаабыт Айсен Молуков анал бирииһэ туттарыллыаҕа.

Петр ПАВЛОВ.