Дьокуускайга – Уһук Илин гимнастикаҕа күрэхтэһиитэ

Сахабыт сиригэр уус-уран гимнастика кэнники сылларга тэтимнээхтик сайда турар.

«Манна улахан көмөнү Ульяновскай уобалас федерацията оҥордо. Биһиги оҕолорбут кинилэр базаларыгар олорон, спортивнай оскуолаҕа дьарыктананнар 2019-2024 сылларга 12 гимнастка спорт маастара буола үүннэ», — диэн кэпсээтэ бүгүҥҥү пресс-конференцияҕа Саха сирин уус-уран гимнастикаҕа федерациятын ситэриилээх дириэктэрэ Иванна Шишигина.

Оттон 2023 сылтан олимпийскай чемпионка Ксения Дудкина биһиэхэ сүрүн тренер быһыытынан үлэлии кэлбитэ. Ол түмүгэр спортсменкаларбыт биллэ-көстө сайда туралларын, маастарыстыбалара үрдээн иһэрин, ситиһиилэр даҕаны баалларын туһунан иһиттибит.

Итинтэн сиэттэрэн, бу ый 11-17 күннэригэр киин куораппытыгар 11-12 уонна 13-14 саастаах кыргыттарга Уһук Илиҥҥи федеральнай уокурукка бастыыр иһин күрэхтэһии ыытыллара быһаарыллыбыт. Бу эппиэтинэстээх түһүлгэҕэ үс сүүсчэкэ эдэр гимнастка кыттара күүтүллэр. Уус-уран гимнастикаҕа бачча үрдүк таһымнаах күрэхтэһии урукку өттүгэр ыытылла илик.

Тэрээһин 9 нүөмэрдээх спортивнай оскуолаҕа ыытыллыаҕа.

Гаврил СТРУЧКОВ.