«Үрүҥ ладья» бирииhигэр

«Үрүҥ ладья» үөрэх тэрилтэлэригэр Бүтүн Россиятааҕы саахымакка күрэхтэһии республикатааҕы түһүмэҕэ түмүктэннэ. Биэс күннээх күрэхтэhиигэ Бүлүү, Кэбээйи, Ленскэй, Мэҥэ-Хаҥалас, Нам, Ньурба, Таатта, Хаҥалас, Уус-Алдан, Үөһээ Бүлүү, Өлүөхүмэ, Чурапчы уонна киин куорат, барыта 24 хамаанда кытынна. Киин куораттан 5 хамаанда, Нам, Ньурба, Таатта, Чурапчы, Хаҥалас, Өлүөхүмэ, YөҺээ Бүлүү улуустарыттан иккилии хамаанда кыттан, түөртүү дуоскаҕа 94 кыттааччы 9 турга күрэхтэстэ.

Буоларын курдук, Амма, Горнай, Мирнэй уонна хотугу улуустар хамаандалара кыттыбатылар. Үhүс тур кэнниттэн НПСОШ-2 хамаандата (Данил Эверстов, Алена Румянцева, Кирилл Кубаров, Алиса Харлампьева) лидер буола түстэ уонна күрэхтэһии бүтүөр дылы утарсааччыларын кыайталаан, наар инники сырытта.

Арай, сэттис турга кыра ахсаанынан ЯГНГ хамаандатыгар хоттордо, 26,5 очукуону хомуйан бастаата итиэннэ Бүтүн Россиятааҕы күрэхтэһиигэ республика чиэһин көмүскүөҕэ. Эрдэ сабаҕалааhынан киин куорат ити икки хамаандата чемпион аатын былдьаhара, оттон үhүс миэстэни хас да хамаанда былдьаhаллара сэрэйиллибитэ. Кыайыылаахтан очукуо аҥаара хаалан ЯГНГ хамаандата (Тимур Слепцов, Ильдар Азаргинов, Андриан Бучугасов, Диана Владимирова) иккис буолла.

Алтыс тур кэнниттэн Чурапчы улууhун Хатылы оскуолатын хамаандата үhүс миэстэҕэ тахсыбыта. Бүтэhик тур иннигэр кинилэртэн икки хамаанда очукуо аҥаара хаалан испиттэрэ. Онон бүтэhик тур быһаарда. Таатта лицейын хамаандата Хатылы оскуолатын кытта тэҥнэһэрин мүччү тутта уонна 1:3 ахсаанынан хоттордо. Таатта төрдүс дуоскаҕа оонньооччута иккилии ладьялаах партия түмүктүүр кэрчигэр үс пешка ордуктаах эрээри, хотторон кэбистэ.

Хатылы уонна Мохсоҕоллох хамаандара 22 очукуоланнылар, Хатылы хамаандата (Юлиана Максимова, Сандаара Павлуцкая, Амелия Романова, Мичийэ Попова) коэффициенынан баһыйан үһүс буолла.

Бэһис миэстэҕэ «Центр глобального образования» гимназиятын хамаандата 21 очукуоны ылан таҕыста, 20 очукуолаах Мүрү иккис оскуолатын хамаандата алтыс буолла.

Бастакы дуоскаҕа Артем Игнатьев (Сангар гимназията) бастаата, Дамдин Содномов (Абаҕа-Өлүөхүмэ оскуолата) иккис, Тимур Слепцов (ЯГНГ) үһүс миэстэни ыллылар. Иккис дуоскаҕа Алена Румянцева (НПСОШ-2) бастаата, Айтал Павлов (Чычымах оскуолата) иккис, Ильдар Азаргинов үһүс буоллулар. Үһүс дуоскаҕа Алеша Мартынов (СПЛ) кыайда, Алеся Сысолятина (Тааттааҕы лицей) иккис, Олег Шахурдин (Майатааҕы лицей) үһүс миэстэ буоллулар. Төрдүс дуоскаҕа Алиса Харлампьева (НПСОШ-2) бастакы, Мичийэ Попова (Хатылы оскуолата) иккис, Нарыйаана Акимова (Хоро оскуолата Өлүөхүмэ) үһүс миэстэлэргэ тигистилэр.

Петр ЯКОВЛЕВ.

Хаартыскаҕа: Кыайыылаах НПСОШ-2 хамаандата.