Үөһээ бүлүүлэр бастаатылар

Олунньу 22 күнүгэр Бүлүү бөлөҕүн улуустарын инбэлииттэрин 10-с төгүлүн ыытыллар культурнай-спортивнай фестиваллара быйыл Сунтаарга икки сиринэн ыытылынна: 2-с нүөмэрдээх оскуола саалатыгар уонна Абаҕа культ-спорт комплекска.

Фестиваль үөрүүлээх арыллыытын Айсен Федоров «Сунтаар сирэ» диэн ырыанан саҕалаата.

Бу күн бэйэлэрин эҕэрдэлэрин эттилэр: Сунтаар улууһун баһылыгын социальнай имиджевай политикатыгар салайааччытын солбуйааччыта М.Иванов, Соцхаралта салаатын салайааччыта М.Тимофеев, спорт отделын салайааччыта Дь.Егоров, инбэлииттэр обществоларын бэрэссэдээтэлэ Н.Максимова, адаптивнай спорт тренерэ, фестиваль сүрүн судьуйата А.Жараев.

Күүстээх санаалаах дьонтон сөҕөллөрүн, кинилэринэн киэн тутталларын, истиҥ доҕордуу сыһыаннарыттан үөрэллэрин этэн туран, ким кыайыыга дьулуурдаах – ол кыайдын диэн алгыс тылларын тириэртилэр.

Быйылгы фестивальга Үөһээ Бүлүүттэн, Ньурбаттан уонна Сунтаартан 100-тэн тахса күрэхтэһээччи флешмоб, остуол тенниһэ, хабылык, хаамыска, дуобат, саахымат, буулдьанан ытыы, голбол, олорон эрэ волейбол көрүҥнэргэ күөн көрүстүлэр.

Түмүккэ, 1-кы миэстэни Үөһээ Бүлүү, 2-с миэстэни Сунтаар, 3-с миэстэни Ньурба хамаандалара ыллылар. Эһиилги маннык фестиваль Күөх Ньурбаҕа ыытыллыаҕа.

Алена ДМИТРИЕВА, олорон эрэн волейболга Европа уонна аан дойду чемпиона, Россия спордун үтүөлээх маастара.