Ытык кырдьаҕастыын астына-дуоһуйа көрүстүбүт

Бүгүн Сэмэн Афанасьевичтыын үгэс быhыытынан Мархаҕа олорор биир дойдулаах ытык кырдьаҕаспытыгар – Аҕа дойду Улуу сэриитин кыттыылааҕа, саахымат куттаах спорт бэтэрээнэ, 101 саастаах Наум Трифонович Слепцовка, сыллааҕы отчуоппутун туттара бара сырыттыбыт.  

Болдьоспуппут курдук эбиэттиир кэмигэр тиийээт остуолга олорон ирэ-хоро кэпсэтэн, ааспыт сыл хас биирдиибитигэр хайдах ааспытын, Саҥа дьыл хайдах саҕаламмытын уонна инники туох хайдах буолуохпутун сөбүн тоокколостубут. Өрүү да буоларын курдук, Наум Трифонович сонуннары сэргии иhиттэ уонна сөҕүөхпүт иhин, урукуну-хойуккуну кытта ситимнээн өссө тугу күүтэрин чопчу этэн сөхтөрдө.

Ол курдук, Чөркөөххө саҥа спортивнай комплекс аhылларын истэ-билэ олорор эбит. Нэhилиэк баhылыгынан үгүс сыл устата таhаарыылаахтык үлэлээбит Семёнов Андрей Петрович бокуонньук туhунан иhирэх тылынан ахтан ааста. Өссө Кириэс Халдьаайыга олорор эрдэҕиттэн билсэллэр эбит. Оччолорго Андрей Петрович олох эдэр сылдьан Чөркөөххө күтүөт буолан саҥа кэлэн олорон волейбол күрэхтэhиитигэр кытта тиийэн хамаанданан бары кинилэргэ хонон-өрөөн бараллара үhү.  Кэлин куоракка киирдэҕинэ быыс-арыт булан Мархаҕа араас кэhии тутуурдаах тиийэн ыалдьыттаан, кэпсэтэн-ипсэтэн барара диир. Спортивнай комплекска хайаан да саахымат кулуубун арыйан, тренер булан үлэлэтиэххэ наада диэн уонна өссө ити комплекска Андрей Петрович аатын да иҥэриэххэ баар этэ диэн этиилээх.

Кырдьаҕас сыллааҕы былаана эмиэ чуолкай. Аны сайын төрөөбүт-үөскээбит Чээнийэбэр убайдыы-бырааттыы Василий, Наум, Николай Слепцовтар сквердэрин арыйар санаалаахпын диир.

Ааспыт сылга Саха сиригэр саахымакка республика чемпионун үрдүк аатын ылан үйэ чиэппэрэ буолан баран, Таатта аатын хаттаан дорҕоонноохтук ааттаппыт саҥа эрэлбит Альберт Постников туhунан кэпсэтиини олус сэргээн иhиттэ. Ону ааhан иллэрээ сыл Дьокуускайга ыытыллыбыт «Азия оҕолоро» оонньууга Казахстан уолугар хотторбутуттан санаата түспэтэх эбит диэн хайҕаата уонна тыыннаахпар Саха сириттэн бастакы гроссмейстер буолара буоллар диэн баҕа санаатын эттэ. Итини истэ олорон биир бэйэм Наум Трифонович 100 сааhын туолбутун Бырабыыталыстыба иккис дьиэтигэр чиэстээhиҥҥэ сөхтөрбүт түгэнин санаан кэллим. Актовай саала тобус-толору киhи этэ. Мин хайа кун эмиэ кыратык хойутаан тиийэммин, саамай улаҕа муннукка олорон ол сиэри-туому көрбүтүм. Онно тойон-хотун бөҕөтө эҕэрдэ эппиттэрэ-тыыммыттара да, истэрим мөлтөх буолан, туох диэбиттэрин соччо истибэккэ олорбутум. Оттон Наум Трифонович харда этиитин адьаhын барытын истибитим. Бу куолаhа улаханын, этэрэ-саҥарара чуолкайын!

Оттон Чөркөөххө тиийэн «Мэндэҥэ суhума» диэн кини 100 сааhын туолбут өрөгөйдөөх үбүлүөйүгэр аналлаах саахымат республикатааҕы турнирыгар тиийэ сылдьан күрэхтэhии түмүгүн таhаарыы уонна кыайыылаахтары наҕараадалааhын сиэрин-туомун усталаах туоратын тухары (кырата балтараа-икки чаас устата!) көбүс көнөтүк олорон истибитин көрөн сөхпүттэр эмиэ бааллара.

Ол курдук, бүгүҥҥү кылгас соҕус көрсүhүүгэ эмиэ Наум Трифоновичка тиийэн таҥараҕа тиксибит курдук сананан, астынан-дуоhуйан, били аныгы дьон сөбүлээн туттар тылларынан эттэххэ, позитивнай заряд бөҕөтүн ылан, аны сайын бары Чээнийэҕэ көрсөр уонна бу сыллааҕы отчуоппутун ахсынньы ый бүтүүтэ мустан туттарарга болдьоhон тарҕастыбыт.

Дмитрий МОСОРИН.