Виктор Рассадин финалга таҕыста

Бүгүн, Красноярскайга, икки төгүллээх олимпийскай чемпион Иван Ярыгин кэриэһигэр спортивнай тустууга (дьахталлар тустууларыгар уонна көҥүл тустууга) норуоттар икки ардыларынааҕы турнир саҕаланна.

Хапсыһыылар эр дьоҥҥо – 57, 61 уонна 70 кг ыйааһыннарга ыытылыннылар. Ылан көрдөххө, Саха сирин хамаандата сүрүннээн бу ыйааһыннарга күүстээҕин быһыытынан, ээр-сэмээр үчүгэй көрдөрүүнү кэтэспиппит.

Хапсыһыылар түмүктэринэн, Виктор Рассадин үчүгэй тустар таһымыгар сылдьарын көрдөрдө. Кини утуу-субуу китаец Йерболаты 10:0, дагестанец Исубгаджиевы ыраастык, бэйэтин бииргэ эрчиллэр доҕорун Айсен Потаповы (иккиэн тренер А.К. Константинов салалтатынан дьарыктаналлар) 9:2 уонна финалга тахсар иһин киирсиигэ дагестанец Далгатовы 7:0 ахсааннарынан эрэллээхтик кыайталаата. Манна кини ордук утарсааччыларын партерга түһэрэн баран “растяжка” диэн, ууннары тардар албаһы сатабыллаахтык туттубута, кыайыылаах буолла. Дьэ, сөбүлээн туттуллар албас (коронка) туһата итиннэ сытар.

Сарсын быһаарыылаах хапсыһыыга Виктор – осетин Давид Баевы кытта утары тахсыаҕа.

Биир улахан үөрүйэхтээх тустуукпут, Европа уонна аан дойду чемпионатын боруонса призера Арыйаан Тютрин 57 киилэҕэ боруонса мэтээл иһин тустар буолла. Кини ордук, уруккуттан эриһэр утарсааччыта, дагестанец Рамиз Гамзатовы ыраастык кыайбытын бэлиэтиэххэ сөп.

Ити курдук, сарсын Артем Слепцов, Лев Павлов (57 кг), Александр Авелов (61 кг) уонна Айсен Потапов (70 кг) “санааны уоскутар” бөлөххө тустуохтара.

PS: Күрэхтэһии бастакы күнүгэр биһиги бөҕөстөрбүт кими кытта хайдах тустубуттарын dzulurgan.ru сайтка тахсыбыт бу — https://dzulurgan.ru/2026/01/yarygin-kuboga-2026-bastaky-kүn-tustuulara-saҥardyllan-iһer/ суруйууттан билсиэххитин сөп.

Финалга көрсүөхтэрэ:

57 кг Мунх-Эрдэнэ Батхуяг (Монголия) – Муса Мехтиханов (Россия)

61 кг Чермен Тавитов – Кежик Монгуш (иккиэн Россия)

70 кг Виктор Рассадин (Таджикистан) – Давид Баев (Россия).

PS: Уолаттарбыт кэккэ киирсиилэрин видеотын “Дьулурҕан” хаһыат телеграмҥа t.me/dzulurgan каналыгар көрүөххүтүн сөп.

Петр ПАВЛОВ.