Урбаанньыт, тустуук оҕолорго бириэмийэ олохтоото

Максим Забровскай 2000 сыллаахха Хара спортивнай орто оскуолатын бүтэрбитэ. Тустуунан дьарыктаммыта. Көҥүл тустууга РФ спордун маастарыгар кандидат, хапсаҕайга СӨ спордун маастара. Хапсаҕайга өрөспүүбүлүкэ чемпиона, элбэх турнирдар кыайыылаахтара. Билиҥҥэ диэри аҕам саастаахтарга тустар.

Урбаанньыт Максим Дмитриевич Майаҕа баар “Максим” атыы киинин уонна “Күн” бородуукта маркетын учредителэ. Кэргэнэ Мария Иннокентьевна ити эргиэн кииннэрин дириэктэринэн үлэлиир.

Максим Дмитриевич атыы-эргиэн үлэһитинэн үлэлиэҕиттэн үөрэммит оскуолатыгар өрүү көмөлөһөр, оскуолабыт меценатынан буолар. Тустуук оҕолор дьарыктарыгар кэлэн эмиэ үлэлэһээччи.

Урбаанньыттар бырааптарын көмүскээһин уполномоченнайа, улуус урбаанньыттарын координационнай сэбиэтин председателин солбуйааччы, Мэҥэ Хаҥалас улууһун тустууга федерациятын чилиэнэ М.Д. Забровскай бу күннэргэ Хара оскуолатыгар тустуунан дьарыктанар оҕолорго, кэргэнинээн М.И. Забровскаялыын сүбэлэһэннэр, СӨ үтүөлээх тренерэ Яков Яковлевич Филиппов көрдөһүүтүн ылынан, тустууга ситиһиилээх оҕолорго бириэмийэ олохтоотулар. Өрөспүүбүлүкэ, Уһук Илин, Россия, Европа уонна аан дойду  призердара, чемпионнара буолары ситиспит оҕолор бириэмийэ ылар буолуохтара. Оскуола дириэктэрэ А.А. Оконешников уонна М.Д. Забровскай дуогабар түһэрсэн илии баттастылар.

Маҥнайгы бэриэмийэ көҥүл тустууга Уһук Илин чемпионатын үрүҥ көмүс призеругар Петров Эрсаҥҥа ананна. Бириэмийэни Максим Дмитриевич оскуола линейкатыгар туттарда. Оскуола үөрэнээччилэрэ, учууталлар ытыс тыаһынан эҕэрдэлээтилэр.

Эрсан тохсунньу 16-17 күннэригэр Чита куоракка Уһук Илин чемпионатыгар 85 кг ситиһиилээхтик кыттан кэлбитэ. Билигин олунньу 9-11 күннэригэр Каспийскай куоракка Сахатын сирин чиэһин көмүскүүргэ бэлэмнэнэ сылдьар. Уолбутугар ситиһиини баҕарабыт.

Афанасий ИЛЛАРИОНОВ.