Тугу кэпсэтэр буолаҕыт, диэтэххэ…

// Спорт министиэристибэтигэр Бэчээт күнүнэн көрсүһүү

Бүгүн, олохсуйбут үгэһинэн, Саха Республикатын физическэй култуураҕа уонна спорка министиэристибэтэ – спорду суруйар, кэпсиир, көрдөрөр суруналыыстары мунньан, Россия Бэчээтин күнүнэн эҕэрдэлээтэ.

Бэлиэ түгэн, соторутааҕыта олохтон туораабыт биллиилээх суруналыыс, суруйааччы, общественнай деятель Иван Петрович Ушницкайга кэриэстэбилинэн саҕаланна.

Миниистири бастакы солбуйааччы Гаврил Мохначевскай ааспыт сыллааҕы түмүктэри, үүммүт сылга соруктары кэпсээтэ, суруналыыстар үлэлэригэр махтанна, ыйытыыларга хоруйдаата. Итиэннэ инникитин да бииргэ үлэлииргэ ыҥырда.

Ол курдук, Гаврил Михайлович, үүммүт саҥа сылга спорт тутуулара үлэҕэ киирэллэрин, буоларын курдук Роман Дмитриев уонна Дмитрий Петрович Коркин кэриэстэригэр тустууга күрэхтэһиилэр ыытыллалларын, ону тэҥэ олимпийскай призер Александр Николаевич Иванов үбүлүөйдээх 75 сааһын, саха тустуутун 70, саха бөҕөстөрө 1976 сыллаахха Монреаллааҕы Олимпиадаҕа өрөгөйдөрүн 50, “Урожай” спортивнай общество 75 сылларын, өссө хайыһар, саахымат көрүҥнэрин үбүлүөйдэрин, Нерюнгри куоракка мас-рестлиҥҥэ Россия чемпионата, адаптивнай спорт көрүҥнэригэр спартакиада буоларын туһунан билиһиннэрдэ.

Ол быыһыгар, быйылгы сылга хаһааҥҥытааҕар даҕаны үбүлээһин мөлтөҕүн санатта. Салгыы кини эһиил Ньурбаҕа ыытыллар Саха сирин норуоттарын IX спортивнай оонньууларыгар сүүмэрдиир күрэхтэһиилэр быйылгыттан ыытыллалларын эттэ. Эҕэрдэтин түмүгэр Гаврил Михайлович, ааспыт сыл Тааттаҕа ыытыллыбыт спорт төрүт көрүҥнэригэр Манчаары XXII оонньуулара ситиһиилээхтик ыытыллыбыттарын, онно уонна атын да күрэхтэһиилэргэ, тэрээһиннэргэ суруналыыстар көхтөөхтүк кыттыбыттарыгар махталын биллэрдэ.

Оттон санаа атастаһыыта уонна ыйытыылар саҕаланнылар. Суруналыыстар, “Земскэй тренер” программанан эдэр специалистар ордук Саха сирин хоту улуустарыгар улэлии барыахтара этэ диэн санааларын тиэртилэр. От ыйын саҥатыгар буолар Спорт суруналыыстарын аан дойдутааҕы күнүн бэлиэтээһиҥҥэ уонна спорт суруналыыстарын федерациятын сөргүтүүгэ министиэристибэ күүс-көмө буоларыгар баҕардылар. Саҥа дьыл аҕай иннинэ, ахсынньы ыйга 4-5 улахан күрэхтэһии биир кэмҥэ ыытылларын, онон ону сырдатыыга күчүмэҕэйдэр үөскүүллэринэн, инникитин спорт календара сөптөөхтүк аттарыллан оҥоһулларын эттилэр. Итиэннэ Россия спортивнай тустууга федерацията көҕүлүүр “Настроение АЛРОСА” спортивнай фестиваля тоҕо сырыы ахсын биир сиргэ ыытылларын, киин улуустарга эмиэ тэриллэрэ буоллар диэн баҕа санааларын эттилэр.

Оттон ыйытыылар тустарынан эттэххэ, сүрүннээн тустуу бэлиэ түгэннэрэ хаһан, ханна ыытыллалларын туһунан буолла. Ол курдук, Гаврил Мохначевскай хоруйдаабытынан, Н.Н. Тарскай кэриэһигэр көҥүл тустууга Саха сирин биирдиилээн уонна хамаанданан бастыыр иһин чемпионата кулун тутар ыйга Таатта киинигэр саҥа тутуллан үлэҕэ киллэриллибит спорт уораҕайыгар буолара былааннаммытын эттэ. Ити курдук, саха олимпиецтарын үйэ аҥардаах уонна саха тустуутун 70 сыллаах үбүлүөйдэрин бэлиэтээһин күһүн, Д.П. Коркин турнирын саҕана тэрийэргэ сорук турарын хоруйдаата. Ол курдук, былааҥҥа – оскуолаларга “олимпийскай чаастар” ыытыллыылара баарын, олимпиецтар тустарынан кинигэлэр бэчээттэнэн тахсалларын эттэ.

Бэлиэ күҥҥэ суруналыыстарга өйдөбүнньүк бэлэхтэр туттарылыннылар. Махтал буолуохтун!

Көрсүһүү – суруналыыстартан аҕа саастаахтара Василий Федорович Посельскай, «Саха» НКИХ радионан биэриитин редактора, спорт бэтэрээнэ – сэргэх ырыатынан түмүктэннэ. Ону “Дьулурҕан” хаһыат телеграмҥа каналыгар t.me/dzulurgan көрүөххүтүн, истиэххитин, сыаналыаххытын сөп.

Бу ырыатынан кини эдэр биир идэлээхтэрин саха спордун сырдатыыга, суруйууга, көрдөрүүгэ өссө күүстээх, эрчимнээх үлэҕэ ыҥырда.

Петр ПАВЛОВ.