Саҥа дьыллааҕы өрөбүллэргэ…

Нам улууһун кэрэ-мааны айылҕалаах Түбэ нэһилиэгэр саҥа 2026 сылы көрсөр тэрээһиннэр бииртэн биир буола тураллар. Ол курдук, 2026 сылы көрсүү, кырачаан оҕолорго анаан утренник, «Саргылаах Саҥа дьылынан» нэһилиэкпит пенсионердарын тэрээһиннэрэ дьону түмэ тардан ыытылыннылар.  

Оттон Ороһооспо күн үгэс курдук, сыл аайы ыытыллар «Көлүөнэлэр көрсүһүүлэрэ» культурнай-спортивнай тэрээһиҥҥэ быйыл 4 хамаанда (оскуола оҕолоро, студеннар, орто көлүөнэ уонна аҕам саастаахтар) спорт сэттэ көрүҥэр: дуобат, саахымат, хабылык, хаамыска, дартс, волейбол, канат тардыһыытыгар көхтөөхтүк күрэхтэстилэр.

Түмүк маннык буолла:

1 миэстэ – орто көлүөнэ, 2 миэстэ – студеннар, 3 миэстэ – аҕам саастаахтар хамаандалара тиксэннэр үөрүү өрөгөйүн биллилэр.

Ону таһынан «Кини кимий?» диэн интеллектуальнай оонньууга күрэстэһээччилэр көхтөөхтүк кытыннылар: 1 миэстэҕэ – аҕам саастаахтар, 2 миэстэҕэ – орто көлүөнэ, 3 миэстэҕэ – студеннар хамаандалара таҕыстылар.

Нэһилиэктэн үгүс элбэх ыччаппыт студент аатын сүгэн үөрэнэ сылдьаллар. Кинилэр төгүрүк остуол тула олорон оскуола оҕолоругар, мустубут дьоҥҥо анаан үөрэхтэрин кэпсээтилэр, санааларын үллэһиннилэр. Кинилэргэ анаан сүбэ-ама тылын нэһилиэкпит бастакы баһылыга, ытык киһибит Розалия Егоровна Лукина тиэртэ.

Хамаандалар грамотанан, минньигэс тордунан наҕараадаланнылар.

Бу тэрээһини сүрүннээн, көҕүлээн «Айхал» норуот айымньытын дьиэтэ (дириэктэр Д.П. Попова), олохтоох модельнай библиотека (сэбиэдиссэй П.А. Шестакова), нэһилиэк спортинструктора А.А. Егоров ыыттылар.

Дарья Петровна ПОПОВА, «Айхал» норуот айымньытын дьиэтин дириэктэрэ.