Утумнар Горнай теннисчиттэрин тургуттулар

Бүгүн Бэрдьигэстээххэ Дьокуускайтан «Утум+» тутуу хампаанньатын иһинэн остуол тенниһигэр дьарыктанар спортсменнар табаарыстыы көрсүһүүнү тэрийдилэр.

Күрэхтэһии кыттыылаахтарын улуус баһылыга Никита Андреев эҕэрдэлээтэ. 2027 сылга Ньурбаҕа ыытыллыахтаах Саха сирин норуоттарын спартакиадатыгар бэлэмнэнии быһыытынан, маннык тэрээһиннэр наадалаахтарын бэлиэтээтэ. Спорт бу көрүҥүн көҕүлүүргэ үлэ ыытыллара кэрэхсэбиллээх диэн эттэ.

Билигин Дьокуускайга үгүс тэрилтэлэргэ теннис остуола турар эбит. Оонньооччулар да аҕыйаҕа суохтар. Онон өрөспүүбүлүкэҕэ спорт сүгүрүйээччилэригэр улахан хамсааһын баар диэн ыалдьыттарбыт бэлиэтииллэр.

«Утум+» теннисистэрин биллэр-көстөр энузиаст-тренер  Аркадий Афанасьев иилээн-салайан аҕалла. Кини өрөспүүбүлүкэ бастыҥ теннистэриттэн ураты, Уһук Илиҥҥи регион түөрт төгүллээх чемпионун Василий Румянцевы дьарыктаабыт үтүөлээх. Аркадий Егорович биһиги биир киэн туттар спорт бэтэрээммитин Радомир Николаевич Сидоровы кытары ыкса билсэр буоланнар, маннык көрсүһүүнү тэрийбиттэрэ үтүө хайҕаллаах дьыала диэх тустаахпыт.

Хардарыта оонньууга биһигиттэн Петр Александров Аркадий Афанасьевы, Василий Алексеев Иван Даниловы, Валентин Петров Николай Даниловы хотон, горнайдары инники күөҥҥэ таһаардылар. Ол кэннэ, «Утум+» теннисистэрэ Александр Пинигин Радомир Сидоровы, Сахая Карпова Антонина Максимованы, Матрена Аржакова Надежда Уразбахтинаны кыайан, ахсааны 3:3 оҥордулар. Түмүккэ, Доҕордоһуу кыайыыта инники күөҥҥэ таҕыста.

Биирдиилээн оонньууларга кэрэ аҥардарга бастакы миэстэни Сахая Карпова, иккиһи Надежда Уразбахтина, үсүһү Матрена Аржакова ылла.

Эр дьоҥҥо пьедестал үктэлин Валентин Петров, Радомир Сидоров, Петр Александров үллэһиннилэр.

Уопуттаах спортсменнар баҕалаах дьону кытары утарыта оонньоон сыһыыларын көрөннөр, сүбэ-ама биэрдилэр. Маастарыстыбаларын үрдэллэригэр хайдах быһыылаахтык дьарыктаныахтаахтарын ыйдылар. Анал тренер үлэтэ улахан суолталааҕын эттилэр.  Биһиги дьоммутуттан бу күҥҥэ уопут ылаары Мытаахтан Семен Скрыбыкин, Бүлүүгэ үөрэнэ сылдьар, кэскиллээх тенисиспит Артем Сидоров анаан-минээн кэлбиттэрэ хайҕаллаах суол.

Спорт бэтэрээнэ Анатолий Осипов уһун үйэлэниигэ, чэгиэн буолууга,  өйү-санааны бөҕөргөтүүгэ эрэ сирдиир остуол тенниһин көрүҥэ, киһиэхэ үтүө эрэ дьайыылааҕын кэпсээтэ. Үүнэр көлүөнэ ыччаты спорт бу көрүҥэр угуйарга сөптөөх үлэ барыахтаах диэн баҕа санаатын анаата.

«Утум+» теннисистэрэ спорду мэлдьи өйүүр, көҕүлүүр тустаах тэрилтэ генеральнай дириэктэригэр Георгий Карамзиҥҥа, Горнай спортсменнарыгар истиҥ махталларын биллэрдилэр. Кэлэр өттүгэр Дьокуускайга кэлэн күрэхтэһэллэригэр ыҥырдылар. Бэрдьигэстээххэ баар остуол тенниһин киинэ тахсыылаахтык үлэлиирин, салалта өйүүрүн астына бэлиэтээтилэр. Түмүккэ, өрөбүл күн туһалаахтык ааста диэн үөрэн-көтөн туран, Александр Пинигин хомус кутуллар дорҕоонун дьүрүһүтэн, махталын биллэрдэ.

Вячеслав АЛЕКСЕЕВ, Горнай.

Ааптар хаартыскалара.