Кыһыҥҥы ХХV Олимпиада чугаһаата

Биллэрин курдук, бастакы кыһыҥҥы Олимпиада Франция Шамони диэн кыракый куоратыгар 1924 сыллаахха ыытыллыбыта. Манна Европа, Америка 16 судаарыстыбатыттан 293 киһи кыттыбыт. Ити кэмтэн 100-тэн тахса сыл аастаҕа.

Оттон кэлиҥҥи Олимпиадалары ахтан-санаан аастахха, 2014 сыллаахха Сочига, 2018 сыллаахха Пченчхаҥҥа (Соҕуруу Корея), 2022 сыллаахха Пекиҥҥэ үрдүк таһымҥа ыытыллыбыттара. Успуорт кыһыҥҥы бырааһынньыгар Кытайга 95 дойдуттан 3000 киһи кыттыбытын санатан ааһыахха дуу.

Кыһыҥҥы ХХV Олимпиада олунньу 6 күнүттэн – 22 күнүгэр диэри Италияҕа, Милан уонна Кортина-Д,Ампеццо куораттарга ыытыллара былааннанар. Урут 1956 с. Кортина-Д,Ампеццо эмиэ кыһыҥҥы Олимпиада былааҕын көтөҕөн турар.

Барыта 16 көрүҥҥэ 116 комплект мэтээл оонньонор. Саҥа көрүҥ – ски-альпинизм диэн киирбит. Быһаччы борустуойдук быһаардахха маннык, хайаны хайыһарынан өрө сүүрэн тахсаат, устан баран сүүрүллэр. Салгыы хайаттан таҥнары түһүү ирдэнэр эбит. Суруйалларынан, 2900-кэ кэриҥэ кыттааччы 90 дойдуттан кэлэрэ былааннанар. Тиһэҕэр тиийэ чуолкайа суох эрээри, Арассыыйаттан уонна Белоруссияттан биирдиилээн спортсменнар күрэхтэһэллэрэ кэтэһиллэр.

Олимпиада символа, логотипа, талисмана, гимнэ бигэргэммиттэр, чуолкайдаммыттар. Оонньуу девиһэ «Это твоя атмосфера» диэн эбит. Инники миэстэлэргэ тахсыыга (фавориты) Норвегия, Германия, АХШ хамаандалара буолуохтара диэн сабаҕалаан ааҕаллар.

Оонньууларга барыта 6 млрд. доллар кэриҥэ ороскуот тахсар диэн иһитиннэрбиттэр. Тэҥнээн көрдөххө, Пекиҥҥэ 2022 с. 3,9 млрд. доллар туттуллубут. Олимпиаданы тэлэбиисэринэн быһаччы көрдөрүү Арассыыйаттан кыттааччы ахсааныттан тутулуктаах буолуо диэн быһаарбыттара. МОК саҥа президенэ Ковентри соторутааҕыта: «Успуорт уонна бэлиитикэ бэйэ-бэйэлэригэр мэһэйи үөскэтиэ суохтаахтар», — диэн эрчимнээх этиитигэр эрэнэбит.

Степан АНДРЕЕВ.

Майа.