Кумааҕы хаһыат хаһан баҕарар суолталаах!

Билигин аныгы дьон сонуну-нуомаһы барытын куйаар ситимиттэн ылар, ааҕар, билэр. Ити гынан, ол куйаар үлэлиир-үлэлээбэт, аһыллар-аһыллыбат, ардыгар олох да сүтэн хаалара баар суол. Холобур, ардыгар куйаар ситимигэр (интернеккэ) да, ватсаапка даҕаны бэҕэһээ аахпыт сонуҥҥун бүгүн булуоҥ суоҕа. Оттон кумааҕы хаһыат – үйэлээх. Этэргэ дылы, сыттыгын анныгар укта сылдьан хаста эмэтэ ылан ааҕыаххын сөп.

Ол иһин биһиги, “Дьулурҕан” хаһыакка сүрүннээн үйэлээҕи, сонуна сүппэти, спорт историятын, бэлиэ түгэннэри, биллиилээх дьон туһунан суруйуулары таһаара сатыыбыт. Онтукайбыт барыта библиотекаларынан, архыыптарынан, биирдиилээн коллекционердарынан кичэллээхтик ууруллан, хараллан иһэр. Дьэ, манна сытар, хаһыат күүһэ, тыл күүһэ. Ол эбэтэр, суруллубут – суоруллубат!

Ол иһин дьону хаһыакка суруйуҥ, бэйэҕит сырдатар дьоҥҥутун, эбэтэр тэрээһиҥҥитин үйэтитиҥ, историяҕа хаалларыҥ, хаһыакка суруттарыҥ диэҥ ыҥыра сатыыбын. Бэйэм библиотекаҕа, архыыптарга элбэхтэ сылдьар хасыһар буолан, хаһыакка бэчээттэммити сүрдээҕин сыаналыыбын, айар үлэбэр туһанабын.

Оттон күннээҕи спорт сонунун “Дьулурҕан” анал сайтыгар dzulurgan.ru уонна телеграмҥа каналыгар t.me/dzulurgan тиһигин быспакка, буруолаппытынан таһаара олоробут. Онон “Дьулурҕан” биир да күнү көтүппэккэ, тиһигин быспакка, ситимин ыһыктыбакка күннэтэ тахсар, суруйар диэххэ сөп.

2025 сыл бэлиэ түгэнинэн, биллэн турар, Тааттаҕа ыытыллыбыт спорт төрүт көрүҥнэригэр Манчаары XXII оонньуулара буолаллар. Ону тэнэ Д.П. Коркин, Роман Дмитриев кэриэстэригэр, Павел Пинигин бирииһигэр көҥүл тустууга норуоттар икки ардыларынааҕы турнирдар, 100 км сүүрүүгэ Россия чемпионата о.д.а. улахан таһымнаах күрэхтэһиилэр ыытыллан, үтүө өйдөбүлү үөскэттилэр. Ону барытын биһиги, спорду сырдатар «Дьулурҕан» ситиммитигэр, ол аата хаһыакка, сайтка, телеграмҥа сиһилии билиһиннэрдибит, былаан оҥостон анаан сырдаттыбыт.

Оттон үүммүт 2026 сыл бэлиэ түгэннэринэн Павел Пинигин, Роман Дмитриев, Александр Иванов Монреаллааҕы Олимпиадаҕа өрөгөйдөрүн 50 сыла, саха тустуутун 70 сыла, Нерюнгри куоракка мас-рестлиҥҥэ Россия чемпионата, “Урожай” спорт общество 75 сыллаах үбүлүөйэ, ону тэҥэ бэс ыйыгар адаптивнай спорт көрүҥнэригэр «Дьулуур» XV үбүлүөйдээх спартакиадата буолуохтара. Дьэ, ону биһиги сыал-сорук оҥостон, анал рубрика аһан суруйар-сырдатар былааннаахпыт.

“Дьулурҕан” – бу  элбэх ааптардар оҥорон таһаарар хаһыаттара. Биһиэхэ биллиилээх суруналыыстар, спорт бэтэрээннэрэ, улуустартан корреспонденнар, студеннар, оскуола үөрэнээччилэрэ бэйэлэрин суруйууларын бэчээттэтэллэр.

Ол курдук, ааспыт сылга «Дьулурҕан» көхтөөх көмөлөһөөччүлэринэн буоллулар: Вера Канаева (Таатта), Дмитрий Мосорин, Михаил Друзьянов, Элеонора Николаева, Виталий Слепцов, Александр Пахомов, Василий Посельскай, Яков Яковлев, Петр Яковлев (Дьокуускай), Степан Андреев, Илья Колосов, Анна Петрова (Мэҥэ Хаҥалас), Афанасий Копырин (Уус Алдан), эдэр корреспонденнар Алексей Саввин, Айхаана Корнилова (Таатта), Сандаара Неустроева (Айыы кыһата), устудьуоннар Анжелина Жданова, Милена Андреева, улуустартан селькордар: Михаил Алексеев (Амма), Харысхан Попов, Анатолий Софронов (Нам), Зинаида Дьячковская (Чурапчы), Иван Уйгуров (Хаҥалас), Вячеслав Алексеев (Горнай), Наталья Руфова (Хатас), уо.д.а.

Кинилэргэ барыларыгар махтанабыт итиэннэ «Дьулурҕаны» кытта сибээстэрин быспаттарыгар, саха спордун сонунун, историятын салгыы суруйа-сырдата, үйэтитэ туралларыгар баҕарабыт!

Петр ПАВЛОВ, «Дьулурҕан» редактора.